უკრაინის პრეზიდენტის ვოლოდიმირ ზელენსკის განცხადებით, მნიშვნელოვანია, რომ უკრაინას მისმა პარტნიორებმა ტანკები მიაწოდონ.
უკრაინას სჭირდება შესაბამისი იარაღი – პრეზიდენტის თქმით, მას უნდა ჰქონდეს ან დიდი რაოდენობით საარტილერიო სისტემა ან ადეკვატური რაოდენობის ტანკები.
„პოლონეთი მზად არის, ასევე ფინეთი, პორტუგალია, ესპანეთი და კიდევ საკმარისი რაოდენობა ქვეყნებისა, რომ უკრაინა ტანკებით უზრუნველყონ. ისინი მზად იყვნენ ეს აქამდეც გაეკეთებინათ. ჩვენ ყველა ველით იმ ქვეყნის ნებართვას, რომელსაც აქვს ამა თუ იმ შესაბამის ლიცენზიებზე უფლება“,- განაცხადა ზელენსკიმ.
ამასთან, ქვეყნის პირველმა პირმა აღნიშნა, რომ უკრაინას არა მხოლოდ პარტნიორების დახმარების იმედი აქვს, არამედ მუშაობს საკუთარი იარაღის წარმოებაზე.
მისივე თქმით, უკრაინისთვის საკმარისი არ არის ის იარაღი, რომლებსაც მას პარტნიორები აწვდიან, რადგან ზელენსკის თქმით, იარაღის მიწოდების სიჩქარეზე დამოკიდებულია ადამიანთა სიცოცხლე.
„საკმარისია თუ არა ის რასაც გვაძლევენ ? არა, არ არის საკმარისი. არ არის საკმარისი იმისთვის, რომ უფრო სწრაფად ვიმოქმედოთ. სისწრაფე და დრო მნიშვნელოვანია. ყოველი წუთი – ადამიანია. რაც უფრო სწრაფად შევძლებთ ჩვენი ტერიტორიების დეოკუპაციას, მით უფრო სწრაფად შევძლებთ, ვიყოთ უფრო ძლიერები, მით მეტ მოქალაქეს შევინარჩუნებთ“,- განაცხადა პრეზიდენტმა ზელენსკიმ.
