სამხედროებს, ვინც ბუჩაში სასაკლაო მოაწყო რუსეთი პერედისკლოკაციის შემდეგ ისევ უკრაინაში გზავნის
“რუსეთის არმიის 64–ე მოტომსროლელი ბრიგადა, რომლის სამხედროებმა ბუჩაში მშვიდობიანი მოსახლეობის მასობრივი წამება და მკვლელობა ჩაიდინეს, უკრაინის ტერიტორიაზე აბრუნებენ. რუსული არმიის ხელმძღვანელობა ამ ქვედანაყოფში პირადი შემადგენლობის როტაციას არ აპირებს და მას კვლავ წინა ხაზზე უშვებს“– აცხადებს უკრაინის დაზვერვა.
მის განცხადებაში ნათქვამია, რომ 4 აპრილის მონაცემებით, ეს ბრიგადა უკრაინიდან ბელორუსის ტერიტორიაზე გაიყვანეს, და ორი კვირით მათ ბელგოროდში დასასვენებლად გაუშვებენ. ამის შემდეგ იგეგმება ბრიგადის დაბრუნება უკრაინაში, სავარაუდოდ ხარკოვის მიმართულებაზე, რომელიც ამ ეტაპზე ერთ–ერთი ცხელი წერტილია.
დაზვერვა ვარაუდობს, რომ ამ ბრიგადის უკრაინაში დაბრუნებას ორი ახსნა აქვს: პირველი, მშვიდობიანი მოსახლეობის დაშინება და მეორე – დანაშაულის მოწმეების სწრაფი “უტილიზაცია“, ანუ უკრაინული დაზვერვების ვარაუდით “ფრონტის ისეთ მონაკვეთზე პერედისლოკაციით, სადაც მათ ცოცხლად გადარჩენის შანსი არ აქვთ, რუსეთი სამომავლოდ სასამართლოებში ჩვენების მიმცემებს თავიდან მოიშორებს. “
რუსეთის თავდაცვის სამინისტრო უარყოფს მისი სამხედროების კავშირს ბუჩაში მშვიდობიანი მოქალაქეების მკვლელობასთან და მოკლული ადამიანების მრავალრიცხოვან კადრებს დადგმულს და პროვოკაციულს უწოდებს.
