ევროკავშირმა ის 14 ქვეყანა დაასახელა, რომელთა მოქალაქეებს 1 ივლისიდან ევროკავშირის ტერიტორიაზე შესვლის უფლება ეძლევათ. ამ სიაში არ არის რუსეთი, აშშ, ჩინეთი და ბრაზილია. ერთადერთი პოსტსაბჭოთა ქვეყანა ამ სიაში საქართველოა.
ევროკავშირის ხელისუფლების გადაწყვეტილებით კორონავირუსის გავრცელების თვალსაზრისით უსაფრთხო ქვეყნებად აღიარეს: ალჟირი, ავსტრალია, კანადა, საქართველო, იაპონია, ჩერნოგორია, მაროკო, ახალი ზელანდია, რუანდა, სერბეთი, სამხრეთ კორეა, ტაილანდი, ტუნისი და ურუგვაი. სავარაუდოდ ამ სიაში ცვლილებები შევა. ის ყოველ ორ კვირაში ერთხელ გადაიხედება.
დიპლომატიური წყაროების ცნობითი ჩინეთი შესაძლოა უსაფრთხო ქვეყნებს შორის მოხვდეს, თუ ჩინეთის ხელისუფლება ევროპელებს ანალოგიურ უფლებას მიცემს.
ბრიტანეთი ევროკავშირიდან ფორმალურად გასულია, თუმცა ის ევროკავშირთან გარდამავალ პერიოდში საერთო პოლიტიკას ინარჩუნებს, მინიმუმ ამ წლის 31 დეკემბრამდე. ამიტომაც ბრიტანეთის მოქალაქეებს ჯერჯერობით იგივე უფლებები აქვთ, რაც ევროკავშირის მოქალაქეებს.
ბიბისის ცნობით სამშაბათს ევროკავშირი საბოლოოდ შეათანხმებს ფორმალურ კრიტერიუმებს, რომელთა მიხედვით ესა თუ ის ქვეყანა უსაფრთხოდ ჩაითვლება. თუმცა ევროკავშირის ქვეყნების უმრავლესობა უკვე შეთანხმებულია ზემოთმოყვანილ სიაზე.
როგორ პასუხობს ევროკავშირის ამ გადაწყვეტილებას საქართველო და რატომ არ იყენებს ამ შესაძლებლობას.
ხელისუფლების მიერ დაანონსებული თარიღის – 1 ივლისის მიუხედავად, ფრენები კვლავ გადაიდო და საქართველოს ცა ისევ ჩაკეტილია. ბოლო მონაცემებით, რეგულარული ავიარეისები 1 აგვისტოდან უნდა აღდგეს. მანამდე შესრულდება მხოლოდ ჩარტერული რეისები. ამის შესახებ ეკონომიკის მინისტრმა, ნათია თურნავამ რამდენიმე დღის წინ განაცხადა. მისი თქმით, მასობრივი ფრენების შემთხვევაში სახელმწიფოს კონტროლის ბერკეტები არ გააჩნია. ქვეყნის მთავრობამ ავიამიმოსვლის გადადება მსოფლიო პანდემიის საფრთხით ახსნა.
თურნავას თქმით, მიუხედავად იმისა, რომ რეგულარული ფრენები ერთი თვით, პირველ აგვისტომდე გადაიწია, ჩარტერული ფრენები სულ მცირე სამი მიმართულებით შენარჩუნდა. ესენია ვენა, ამსტერდამი და ისრაელი. ფრენებს “აირზენა” შეასრულებს.
თურნავა ამბობს იმასაც, რომ ფრენის პროცესის თვითდინებაზე მიშვება ეპიდემიოლოგიური უსაფრთხოების დათმობას ნიშნავს. ამას კი, მისი აზრით, საზოგადოებაში არავინ მოიწონებს.
“ფრენის შესაძლებლობა იქნება, მაგრამ კონკრეტული მიმართულებით, შეთანხმებით, რაც უზრუნველყოფილი იქნება ეპიდემიოლოგიურად, ჯანდაცვისა და საგარეო საქმეთა სამინისტროსთან შეთანხმებით. ტრანსპორტირების პრობლემა არ იქნება, მაგრამ ეს არ იქნება სტიქიური პროცესი. ჩვენ ვიბრძოდით იმისთვის, რომ ვყოფილიყავით ევროკავშირის მიერ გამოქვეყნებული უსაფრთხო ქვეყნების სიაში. ეს არის სწორედ იმის შედეგი, რომ ჩვენ ეფექტიანად ვმართეთ კოვიდ ინფექცია, ეს გამოწვევა და დღეს უსაფრთხო დანიშნულების ადგილი ვართ, რასაც აქამდეც ვამბობდით,“ – ამბობს თურნავა.
ამ დრომდე უცნობია სახმელეთო საზღვრების გახსნის თარიღი.
