უკრაინის თავდაცვის მინისტრის მოადგილემ ანა მალიარმა განაცხადა, რომ უკრაინელმა სამხედროებმა გაათავისუფლეს 3 კვ. კმ ბახმუტის მიმართულებით. მისი თქმით, ბახმუტის მიმართულების სამხრეთ ფლანგზე ჯამში უკვე გათავისუფლებულია 40 კვადრატული კილომეტრი ტერიტორია.
მალიარმა ასევე აღნიშნა, რომ უკრაინის შეიარაღებულმა ძალებმა მიაღწიეს “გარკვეულ წარმატებებს” უროჟაინოეს რაიონში. იქ მძიმე ბრძოლები გრძელდება.
ერთი დღით ადრე რუსული ტელეგრამ არხები წერდნენ, რომ უკრაინის შეიარაღებულმა ძალებმა მოახერხეს სოფლის ჩრდილოეთ ნაწილში შესვლა და ცენტრალურ ნაწილთან საზღვარზე ფეხის მოკიდება, ხოლო სოფლის სამხრეთი ნაწილი რუსი სამხედროების კონტროლის ქვეშ რჩება.
ტელეგრამ არხებზე გავრცელდა სპეკულაციები, რომ რუსმა სამხედროებმა უკვე მიატოვეს უროჟაინოე, მაგრამ BILD-ის ექსპერტმა ჯულიან როპკემ ორშაბათს განაცხადა, რომ ბრძოლა ამ მხარეში გრძელდება.
- „უროჟაინოეში სასტიკი ბრძოლები გრძელდება, ამიტომ მე არ შევცვალე რუკა და ჯერ არ მიხსენებია, რომ ის „განთავისუფლებულია“. ამ დროისთვის რუსული კონტრშეტევა მიმდინარეობს“, – ციტირებს მას BILD-ი.
რუსეთის თავდაცვის სამინისტრომ კვირას განაცხადა, რომ “უკრაინელი სამხედროები აგრძელებენ თავდასხმის მცდელობებს უროჟაინოესა და სტარომაიორსკის მიმართულებით”.
- „უროჟეინოეს დასავლეთით, უკრაინის შეიარაღებული ძალების მცდელობა, აეშენებინათ პონტონური გადასასვლელი მდინარე მოკრი იალის გასწვრივ, ჩაიშალა. პონტონები საარტილერიო ცეცხლით განადგურდა“, – აცხადებენ სამხედრო დეპარტამენტში.
12 აგვისტოს New York Times-მა გაავრცელა ინფორმაცია, რომ უკრაინის არმიამ კონტრშეტევაში „ტაქტიკურად მნიშვნელოვანი“ პროგრესი განიცადა. გამოცემის თანახმად, უკრაინამ ათასობით ჯარისკაცი, მათ შორის ყველაზე გამოცდილი საზღვაო ქვეითები და ჯავშანტექნიკა, მდინარე მოკრი იალის ხეობის სამხრეთით შეტევაში ჩართო.
- ”თუ ისინი მოახერხებენ უროჟაინოეს გარღვევას ან გვერდის ავლას, ისინი იქნებიან 50 მილის (დაახლოებით 80 კმ) მანძილზე აზოვის ზღვაზე მდებარე ორი ძირითადი საპორტო ქალაქიდან, ბერდიანსკიდან და მარიუპოლიდან. უკრაინული ძალების ყოველი კილომეტრით წინსვლა სულ უფრო მეტ ზეწოლას ახდენს რუსების მომარაგების ხაზებზე”.
