ბრიტანეთის პარლამენტის თემთა პალატამ მეორე მოსმენიით მიიღო კანონპროექტი მიგრაციის შესახებ ევროკავშირიდან გამოსვლის შემდეგ. ეს პირველი ნაბიჯია მიგრაციის ახალი სისტემისკენ, რომელიც პრემიერ ბორის ჯონსონის მთავრობის დაპირებით 2021 წლისთვის უნდა შეიქმნას.
ვარაუდობენ, რომ ბრიტანეთის პოტენციური იმიგრანტები მუშაობისა და ცხოვრების უფლებას მხოლოდ იმ შემთხვევაში მიიღებენ, თუ ქულათა გარკვეულ ჯამს მოაგროვებენ. ქულები კი პრეტენდენტის ობიექტური მაზასიათებლების მიხედვით დაირიცხება, როგორიც არის მაგალითად პროფესია, კვალიფიკაცია, განათლება და ასაკი.
კანონპროექტის ინიციატორ მმართველ კონსერვატიულ პარტიას პარლამენტში ხმათა აბსოლუტური უმრავლესობა აქვს.
კანონპროექტის ერთ–ერთმა ინიციატორმა, შს მინისტრმა პრიტი პატელმა კენჭისყრის წინ განაცხადა, რომ კანონის მიღების შედეგად ბრიტანეთში სხვადასხვა, მათ შორის ევროპის ქვეყნებიდან პოტენციური იმიგრანტები თანაბარ პირობებში აღმოჩნდებიან.
წლის ბოლომდე ბრიტანეთი არა მხოლოდ ფორმალურად, არამედ ფაქტიურადაც დატოვებს ევროკავშირის. ამ დრომდე ევროკავშირის მოქალაქეებს ბრიტანეთში შესვლა და ცხოვრება თავისუფლად, შეზღუდვების გარეშე შეუძლიათ.
პატელის ოპონენტი, ჩრდილოვანი შს მინისტრი ნიკ ტომას სიმონდსი აცხადებს, რომ კანონპროექტი ბრიტანეთში ეკონომიკურ უთანასწორობას გააღრმავებს.
მისი თქმით, ახალი სისტემის ფარგლებში დაგეგმილია ხელფასის ქვედა ზღვარი კვალიფიციური მიგრანტებისთვის– 25600 ფუნტია წელიწადში. ამგვარად სამედიცინო, სატრანსპორტო თუ სხვა სფეროების ბევრი მუშაკი, ვინც ამ თანხაზე ნაკლებს გამოიმუშავებს სიგნალს მიიღებს, რომ ისინი ქვეყანას არ ჭირდება– თქვა ტომას სიმონდსმა.
ახალი კანონი არ ეხება უცხოელებს, რომლებიც უკვე ცხოვრობენ და მუშაობენ ბრიტანეთში.
კანონპროექტი “სოციალური შემწეობების და იმიგრაციის შესახებ ევროკავშირიდან გასვლის შემდეგ“ აუქმებს ბრიტანეთის ტერიტორიაზე ევროპული კანონების მოქმედებას გადაადგილების თავისუფლების შესახებ.
ევროკავშირიდან გამოსვლით ბრიტანეთი მის ერთიან ბაზარსაც ტოვებს, რომლის ფარგლებში ადამიანები, საქონელი, მომსახურება და ფინანსები შეუზღუდავად გადაადგილდება.
კანონპროექტი მეორედ მოსმენის შემდეგ პარლამენტის პროფილურ კომიტეტებს გაივლის, შემდეგ კი მისი ფინალური კენჭისყრა შედგება.
კანონის შედეგი მთავრობის ჩანაფიქრით გარკვეული სფეროს თანამშრომელთა მიგრაციის ქულებზე დაფუძნებული სისტემით რეგულირებას ითვალისწინებას, როგორც ეს ავსტრალიაში და კანადაშია.
პრემიერი ჯონსონი აცხადებდა, რომ ახალი სისტემის პირობებში კვალიფიკაცია უფრო მნიშვნელოვანი იქნება, ვიდრე ქვეყანა, საიდანაც მიგრანტი ჩადის. „იმის აღიარებით, რომ ადამიანები უფრო მნიშვნელოვანია, ვიდრე პასპორტები ჩენ შევძლებთ მთელი მსოფლიოდან საუკეთესო კადრების მოზიდვას, სადაც არ უნდა ცხოვრობდნენ ეს ადამიანები“ – ასე დაახასიათა მიგრაციის ახალი სისტემა ჯონსონმა.
მთავრობა მის ამოქმედებას უკვე 2021 წლის იანვრიდან გეგმავს, ანუ იმ მომენტიდან, როცა ქვეყანა ფაქტიურადაც და ფორმალურადაც დატოვებს ევროკავშირს.
