1 ივნისის ღამეს რუსეთმა მორიგი სარაკეტო შეტევა განახორციელა უკრაინის დედაქალაქზე – მინიმუმ მე-18 ბოლო ერთ თვეში.
ახალი დარტყმის შედეგად, ქალაქის სამხედრო ადმინისტრაციის ინფორმაციით, დაიღუპა სამი ადამიანი, მათ შორის 2012 წელს დაბადებული ბავშვი, დაშავდა 14 ადამიანი (მათ შორის ბავშვი).
ადამიანები დაიღუპნენ დესნიანსკის რაიონში, სადაც, როგორც ცნობილია, ნამსხვრევებით დაზიანდა ბავშვთა პოლიკლინიკის შენობა და საცხოვრებელი კორპუსი (აფეთქების ტალღამ აივანიც კი ჩამოაგდო). ნამსხვრევები ასევე დაეცა ორ სკოლას (ჩამტვრეულია ფანჯრები და კარები) და პოლიციის განყოფილებას.
კიევის დნიპროს რაიონში, ცეცხლმოკიდებული ნამსხვრევების ჩამოვარდნის შედეგად, ძლიერი კვამლი გაჩნდა, აფეთქების ტალღამ ფანჯრები დაამსხვრია, აცხადებენ ადმინისტრაციაში. დარნიცკის რაიონში ნამსხვრევები სახლების ეზოებში და არასაცხოვრებელ კორპუსზე ჩამოვარდა, დაზიანდა ცხელი წყლის მილსადენი.
უკრაინის შეიარაღებული ძალების გენერალური შტაბი დილის ანგარიშში იტყობინება, რომ კიევზე ახალი თავდასხმის დროს გამოყენებული იქნა ისკანდერის ოპერატიულ-ტაქტიკური სარაკეტო სისტემის 10 რაკეტა. უკრაინელი სამხედროების ცნობით, ყველა მათგანი ჩამოაგდეს. მათი განცხადებით თავდასხმის სამიზნე სამოქალაქო და კრიტიკული ინფრასტრუქტურის ობიექტები იყო.
უკრაინის შეიარაღებული ძალების საჰაერო ძალებმა დააზუსტეს, რომ მტერმა დაახლოებით 2:45 წუთზე ბრაიანსკის რეგიონიდან შვიდი ისკანდერ-მ რაკეტა და სამი ისკანდერ-K რაკეტა გაუშვა. „ყველა სამიზნე წარმატებით განადგურდა, თუმცა ნამსხვრევების ჩამოვარდნის შედეგად არის მსხვერპლი და დაშავებული“, – ნათქვამია განცხადებაში.
რუსეთის თავდაცვის სამინისტროს კიევზე ახალი საჰაერო თავდასხმის შესახებ კომენტარი არ გაუკეთებია.
