ამ დროისთვის მოძრაობა ყირიმის ხიდზე მთლიანად ჩაკეტილია. მზადდება საბორნე გადასასვლელი ქერჩის სრუტე. ამის შესახებ ყირიმის ხელისუფლება აცხადებს. მინიმუმ ერთი საგზაო ზოლის ორი სექცია დანგრეულია.
რუსეთის ანტიტერორიტული ნაციონალური კომიტეტი აცხადებს, რომ მოხდა დივერსია – ხიდზე სატვირთო ავტომობილის აფეთქება, რის შედეგადაც რკინიგზის შემადგენლობის საწვავით სავსე 7 ცისტერნას ცეცხლი გაუჩნდა. ხიდის ორი საავტომობილო მონაკვეთი ჩამონგრეულია.
ყირიმის საოკუპაციო ადმინისტრაციის ხელმძღვანელი, სერგეი აქსიონოვი ამბობს, რომ ხიდის დაზიანების ხარიხი მოგვიანებით შეფასდება, რაც ცეცხლი ბოლომდე ჩაქრება და მონაკვეთი გაიწმინდება.
თვითმხილველების თქმით, აფეთქება ადგილობრივი დროით დილის 6 საათზე მოხდა. აფეთქება იმდენად ძლიერი იყო, რომ სახლების კედლები ზანზარებდა.
პუტინის პრეს მდივანი აცხადებს, რომ რუსეთის პრეზიდენტმა შესაბამის უწყებებს ყირმის ხიდზე მომხდარი “ხანძრის“ გამოძიება დაავალა. პუტინმა მომხდარის შესახებ ანგარიში ჩაიბარა პრემიერ–მინისტრისა და ძალოვანი უწყებების ხელმძღვანელებისგან და მათ “სამთავრობო კომისიის შექმნა დაავალა მომხადრის მიზეზების გასარკვევად და შედეგების სალიკვიდაციოთ“– ამბობს დიმიტრი პესკოვი.
“ყირიმის რკინიგზა“ დილით აცხადებდა, რომ ქერჩის ხიდზე ხანძარი ცისტერნის აალების შედეგად დაიწყო.
“06:05 საათზე სატვირთო მატარებლის კუდში საწვავის ცისტერნების აალება მოხდა. მიმდინარეობს საავარიო სამუშაოები. მომხდარის მიზეზები დგინდება“– გაავრცელა განცხადება ყირიმის რკინიგზამ აფეთქებიდან მალევე.
ამასთან, თვითმხილველების მიერ გამოქვეყნებულ სხვადასხვა კადრებზე ჩანს, რომ სარკინიგზო მონაკვეთზე ხანძრის გარდა, დაინგრა გზის ზედაპირი.
