რუსეთის თავდაცვის მინისტრმა, სერგეი შოიგუმ განაცხადა, რომ რუსეთის არმიამ შეგნებულად შეანელა შეტევის ტემპები, რადგან უნდა მშვიდობიანი მოსახლეობის მსხვერლი თავიდან აირიდოს.
ზაფხულის დაწყებიდან დღემდე, ანუ მას შემდეგ, რაც რუსულმა ძალებმა კონტროლი დაამყარეს ქალაქ ლისიჩანსკსა და სევეროდონეცკზე ლუგანსკის ოლქში, რუსეთის არმიას არანაირი წარმატებისთვის აღარ მიუღწევია. მის მცდელობებს, დონეცკის ოლქის დანარჩენი ნაწილი აიღოს და უკრაინის სამხრეთით წინ წაიწიოს, არანაირი წარმატება არ მოჰყოლია.
ტაშკენტში შანხაის თანამშრომლობის ორგანიზაციის თავდაცვის მინისტრების შეხვედრაზე შოიგუმ წარუმატებლობა ასე ახსნა: “სპეცოპერაციისას მკაცრად ვიცავთ ჰუმანიტარული სამართლის ნორმებს. დარტყმები ხორციელდება მაღალი სიზუსტის იარაღით სამხედრო ინფრასტრუქტურის ობიექტებზე, უკრაინის შეიარაღებული ძალების მართვის პუნქტებზე, აეროდრომებზე, საწყობებზე, სამხედრო–სამრეწველო კომპლექსის ობიექტებზე. ამასთან, ყველაფერი კეთდება იმისათვის, რომ თავიდან ავიცილოთ მშვიდობიანი მოსახლეობის მსხვერპლი. რა თქმა უნდა, ეს ანელებს შეტევის ტემპებს, მაგრამ ამაზე შეგნებულად მივდივართ“–ციტირებს რუსული სააგენტო ТАСС შოიგუს.
უკრაინის ხელისუფლება, საერთაშორისო ორგანიზაციები და დასავლეთის ქვეყნები არაერთხელ აცხადებდნენ, რომ რუსეთის არმიის ქმედებების შედეგად უკრაინაში მუდმივად იღუპებიან მშვიდობიანი მოქალაქეები და ნადგურდება ქალაქების სამოქალაქო ინფრასტრუქტურა.
დონეცკის ოლქში, ქალაქ მარიუპოლის ალყისას ეს ქალაქი პრაქტიკულად მთლიანად განადგურდა რუსების საავიაციო, საარტილერიო და სარაკეტო დარტყმების შედეგად. დაიღუპა მინინიმუმ ასეულობით მშვიდობიანი მოქალაქე. დაღუპულთა ზუსტი რაოდენობა ჯერ დაუდგენელია. მნიშვნელოვანი ნგრევა მოხდა სევეროდონეცკში, სადაც ქუჩის სასტიკი ბრძოლები მიმდინარეობდა.
დასავლელი სამხედრო ექსპერტების აზრით, რუსი სამხედროების შეტევა იმის გამო ფერხდება, რომ უკრაინის შეიარაღებულმა ძალებმა შეძლეს რუსეთის არმიის უპირატესობის შემცირება ზურგში მათი საბრძოლო მასალების საწყობების და სხვა სამხედრო ობიექტების განადგურების შედეგად. ამისათვის მაღალი სიზუსტის შორსმსროლელი სისტემები გამოიყენება, რომლებიც უკრაინას დასავლეთმა მიაწოდა.
დასავლური დაზვერვები და უკრაინის ხელისუფლება ამტკიცებენ, რომ რუსეთის არმიაში ძალიან დაბალ დონეზეა მორალური სულისკვეთება, დანაკარგები კი იმდენად დიდია, რომ შევსება სულ უფრო რთულია.
