“ჩამოვაყალიბებთ ჩრდილოვან ქალაქის მთავრობას, ყველა ძირითადი პარტია ჩაერთვება”- ამის შესახებ, თბილისის მერობის ოპოზიციურმა კანდიდატმა და ენმ-ის თავჯდომარემ, ნიკა მელიამ “მთავარი არხის” ეთერში განაცხადა. როგორც მელია აცხადებს, მეორე ტურის საარჩევნო კამპანიაში სხვადასხვა პარტიების წევრები ჩაერთვებიან, სხვა პარტიის წევრებთან კონსულტაციები კი აღნიშნულ საკითხთან დაკავშირებით, უახლოეს დღეებში გაიმართება.
“ჩვენ არ ვაპირებთ მხოლოდ ნაციონალური მოძრაობის წევრების მიერ დავაკომპლექტოთ. ეს უნდა იყოს სამართლიანად გადანაწილებული, ყველა ძირითად პარტიას უნდა ჰქონდეს შესაძლებლობა, რომ წილი ჩადოს იმ გამარჯვებაში, რომელსაც ჩვენ მივაღწევთ და მოვუტანთ ამ ქალაქს 30 ოქტომბერს. ამიტომ, მე ვთავაზობ და უახლოეს დღეებში, ეს კონსულტაციები გაიმართება, ჩვენ ჩამოვაყალიბებთ ამ ჩრდილოვან ქალაქის მთავრობას და მერე უკვე გვექნება პრეზენტაცია, სადაც საზოგადოებაც დარწმუნდება იმაში, რომ ჩვენ არა მხოლოდ ვსაუბრობთ, არამედ საქმესაც ვაკეთებთ და ვგულისხმობთ იმას, რასაც ვამბობთ”,-განაცხადა ნიკა მელიამ.
