საფრანგეთის პროკურატურის ინფორმაციით პარიზის გარეუბანში პარასკევს საღამოს სკოლის მასწავლებელს თავი 18 წლის წარმოშობით ჩეჩენმა კაცმა მოაჭრა, რომელიც მოსკოვშია დაბადებული.
საფრანგეთის ხელისუფლების განცხადებით თავდამსხმელი აბდულაკ აბუეზიდოვიჩია. ის 2002 წლის 12 მარტს მოსკოვში დაიბადა, საფრანგეთში კი დევნილის სტატუსი ქონდა.
47 წლის მასწავლებლის, სამუელ პატის მისამართით მუქარები მას შემდეგ დაიწყო, რაც მან გაკვეთილზე მოსწავლეებს წინასწარმეტყველი მუჰამედის კარიკატურები აჩვენა.
პოლიცია სამუელ პატიზე თავდასხმას ტერაქტის კვალიფიკაციით იძიებს. ის ადგილობრივი დროით 17 საათზე მოხდა ქუჩაზე, რომელიც პარიზის სამხრეთ დასავლეთით, პატარა ქალაქ კონფლან სენტ ონორინის მდიდრულ ქუჩაზე მოხდა. თავდამსხმელი მასწავლებელს სკოლის სიახლოვეს დიდი დანით დაესხა თავს და კისრის არეში არაერთი ჭრილობა მიაყენა, შემდეგ კი თავი მოაჭრა.
თვითმხილველთა ინფორმაციით თავდასხმის მომენტში ის ყვიროდა “ალაჰ აკბარ“.
თავდამსხმელმა მიმალვა სცადა, თუმცა პოლიცია ადგილზე მალე მივიდა. მას პოლიციამ მეზობელ ქალაქ ერანიმდე სდია. დანებების მოთხოვნაზე დამნაშავემ იარაღით მუქარა დაიწყო, რის შემდეგაც პოლიციამ ცეცხლსასროლი იარაღით მოკლა.
ფრანგული მედიის ინფორმაციით თავდამსხმელი არ ირიცხება რადიკალების სიაში, თუმცა ერანიის კომუნის ბანდის წევრი იყო, რომელსაც ასევე მიეკუთვნებოდა პოლიციისთვის ცნობილი ისლამისტი.
რუსეთის საელჩო პარიზში საფრანგეთის ხელისუფლებასთან კავშირშია მასწავლების მკვლელობის საქმესთან დაკავშირებით, რომელშიც ეჭვმიტანილი რუსეთის მოქალაქეა – განაცხადა დღეს რუსეთის დიპლომატიურმა მისიამ.
ამ დროისთვის პოლიციამ ცხრა ეჭვმიტანილი დააკავა. თავიდან დააკავეს თავდამსხმელის ოთხი ნათესავი, მათ შორის ერთი არასრულწლოვანი. მოგვიანებით გამოძიების ფარგლებში კიდევ ხუთი ადამიანი დააკავეს , მათ შორის სკოლის მოსწავლეების ორი მშობელი, სადაც მოკლული მუშაობდა. ადგილობრივი მედიის ინფორმაციით ისინი უკმაყოფილებას გამოთქვამდნენ იმის გამო, რომ მასწავლებელმა მოსწავლეებს წინასწარმეტყველი მუჰამედის კარიკატურები აჩვენა.
კარიკატურები, რომლებიც ისტორიის და გეოგრაფიის მასწავლებელმა, სამუელ პატიმ მასწავლებელმა ბავშვებს ანტიკლერიკალიზმისა და სიტყვის თავისუფლების შესახებ გაკვეთილზე აჩვენა, წარსულში შარლი ებდოში გამოქვეყნდა, რამაც ბევრ მუსულმანურ ქვეყანაში აღშფოთება გამოიწვია. 2015 წელს ამ კარიკატურების გამო რედაქციას ჯიხადისტები დაესხნენ თავს და მისი 12 თანამშრომელი მოკლეს.
საფრანგეთის პრეზიდენტმა ემანუელ მაკრონმა და პრემიერმა ჟან კასტეკსმა მასწავლებლის მკვლელობის ფაქტი კატეგორიულად დაგმეს, ისლამური ტერორიზმის ნიმუში უწოდეს და პირობა დადეს, რომ ხელისუფლება მას პასუხს გასცემს.
