წყალტუბოში COVID-19-ით ინფიცირების პირველი შემთხვევა დაფიქსირდა. კორონავირუსი 62 წლის მამაკაცს დაუდგინდა, რომელიც დასუფთავების სამსახურში მუშაობს. ის ქუთაისის ინფექციურ საავადმყოფოშია გადაყვანილი.
დღეს პოლიციამ მისი ოჯახის წევრები კარანტინში იძულებით გადაიყვანა. ისინი დაავადებათა კონტროლის ეროვნული ცენტრის წარმომადგენლებს არ დაემორჩილნენ, რის შემდეგაც მათ პოლიცია გამოიძახეს. ისინი სავარაუდოდ წყალტუბოს ერთ-ერთ სასტუმროში, საკარანტინე ზონაში მოათავსეს.
ცენტრის წარმომადგენელი მთავარ არხთან ამბობს, რომ ეპიდკვლევა ღამით დაიწყო და კაცის 10-ზე მეტი კონტაქტი დადგინდა, რომლებიც იდენტიფიცირებულები არიან. სიმპტომების მქონე პირებს შესაბამისი ლაბორატორიული კვლევები ჩაუტარდებათ.
ამ დროისთვის ქვეყანაშო კორონავირუსის 511 შემთხვევაა დადასტურებული, მათგან 156 გამოჯანმრთელდა, 6 გარდაიცვალა.
