ყოველკვირეულმა გამოცემამ, Economist-მა გამოაქვეყნა სტატია იმის შესახებ, თუ როგორ შეუძლია უკრაინის არმიას შემდგომი მოქმედება ხერსონის განთავისუფლების შემდეგ (ავტორი ტრადიციულად არ არის დასახელებული, მაგრამ ეს არის შაშანკ ჯოში, როგორც მისი Twitter-დან ჩანს ). ყველაზე საინტერესო პუნქტები, რაზეც გამოცემა ყურადღებას ამახვილებს:
უკრაინას აქვს სამი მიმართულება შემდგომი შეტევისთვის. შეიძლება მან სცადოს დნეპრის ფორსირება ქვედა დინების მიდამოებში, მაგრამ ეს რთული ამოცანაა – ის, რაც ასე ართულებდა რუსეთის ჯარების პოზიციებს ხერსონის გარშემო, ახლა უკრაინის არმიას შეუშლის ხელს. შესაძლებელია შეტევის განვითარება ჩრდილო-აღმოსავლეთში, ამ მხარეში რუსი სამხედროების დაბალი მორალის გათვალისწინებით. და ბოლოს,უკრაინელებმა შეიძლება დაიწყონ შეტევა ზაპოროჟიედან აზოვის ზღვისკენ, მაგრამ ეს ასევე უკიდურესად ამბიციური ამოცანაა.
რუსეთის სარდლობა დიდი ხანია ელოდება უკრაინის შეტევას ამ მიმართულებით და მრავალფენიან თავდაცვის ხაზებს აშენებს. ეს სიმაგრეები „სტატიკური და მოძველებულია, მაგრამ ისინი ემსახურებიან თავის მიზანს“, – განუცხადა ავტორს „დასავლური“ წყარომ.
ეს ხშირად გვესმის, მაგრამ დასავლური წყაროები მაინც თვლიან, რომ რუსეთს საბრძოლო მასალა ეწურება და არა მარტო რაკეტები, როგორც ხშირად ამბობენ, არამედ საარტილერიო ჭურვებიც. „ისკანდერი“, მათივე ინფორმაციით, დაახლოებით 120 ცალია დარჩენილი, საარტილერიო საბრძოლო მასალა – ერთი თვის სამყოფი. წყაროები თვლიან, რომ სწორედ ეს არის ხერსონიდან რუსული ჯარების უკან დახევის ერთ-ერთი მთავარი მიზეზი.
მაგრამ უკრაინისთვის ცუდი ამბავი ის არის, რომ არც მას აქვს საბრძოლო მასალის ჭარბი რაოდენობა. ეს განსაკუთრებით ეხება საჰაერო თავდაცვას.
ამის გამო პესიმისტები თვლიან, რომ მინიმუმ ამ ზამთარს უკრაინის შეტევა აღარ იქნება. თუმცა, ოპტიმისტები აღნიშნავენ, რომ უკრაინელებს მნიშვნელოვანი რიცხობრივი უპირატესობა აქვთ- მათ ჰყავთ 200-300 ათასი საბრძოლო მზადყოფნაში მყოფი სამხედრო 100 ათასზე ნაკლები რუსულის წინააღმდეგ. უკრაინელების მორალური სულისკვეთება მაღალია, ეს კი ხელს შეუწყობს ზამთრის სიძნელეების დაძლევას. და უკრაინას აქვს უფრო ზუსტი მართვადი საბრძოლო მასალა, როგორიცაა GMLRS და Excalibur მართვადი რაკეტები.
საკმარისი მარაგით, უკრაინის არმიას შეუძლია გააგრძელოს ქვეყნის განთავისუფლება, მაგრამ შემდგომი წარმატებები ნაკლებად იქნება ხარკოვის სექტემბრის ბლიცკრიგის მსგავსი, არამედ ეს იქნება უფრო ომი გამოფიტვაზე – ამბობს მაიკლ კოფმანი, CNA ინსტიტუტის რუსული კვლევების დირექტორი.
ამასთან, შეტევისას უფრო მეტი საბრძოლო მასალა იხარჯება, ვიდრე თავდაცვის დროს. უკრაინა უკვე ახლა იყენებს შეერთებულ შტატების თვიური წარმოების დიდ ნაწილს GMLRS – რაკეტებისა HIMARS-ისთვის – ამბობს Economist-ის ერთ-ერთი წყარო. მისი თქმით, შეერთებული შტატები და ევროპის ქვეყნები ახლა საბრძოლო მასალის წარმოებას ზრდის, მაგრამ უკრაინა ამის ეფექტს მომავალ ზაფხულამდე ვერ იგრძნობს.
