აშშ-ის პრეზიდენტის, დონალდ ტრამპის, მიერ „ენერგეტიკული ზავის“ გამოცხადების შემდეგ რუსეთმა უკრაინის ენერგეტიკულ და ნავთობგაზის სექტორზე 76 დარტყმა განახორციელა, განაცხადა უკრაინის პრეზიდენტმა ვოლოდიმირ ზელენსკიმ.
„მხოლოდ ამ ღამით დარტყმები განხორციელდა ვინიცის, ჟიტომირის, ხმელნიცკისა და ოდესის ოლქებში მდებარე ქვესადგურებზე. ათიათასობით ოჯახი კვლავ ელექტროენერგიის გარეშე რჩება. ენერგეტიკოსები და სარემონტო ბრიგადები აღდგენით სამუშაოებზე ფაქტობრივად მთელი დღე-ღამის განმავლობაში მუშაობენ“, — დაწერა ზელენსკიმ სოციალურ ქსელებში კვირას, 18 ოქტომბერს.
ტრამპის მიერ „ენერგეტიკული ზავის“ შესახებ განცხადებიდან გასული ერთი კვირის განმავლობაში, ვოლოდიმირ ზელენსკის თქმით, რუსეთმა უკრაინის წინააღმდეგ თითქმის 2 700 დამრტყმელი დრონი, 1 700 ავიაბომბი და 66 რაკეტა გამოიყენა, რომელთა უმეტესობა ბალისტიკური იყო.
„დარტყმების მთავარი სამიზნე სწორედ ენერგეტიკული ინფრასტრუქტურა იყო. რუსეთის ფედერაცია ცდილობს ბლექაუტი მოაწყოს“, — აღნიშნა მან.
„ამერიკამ უნდა დაინახოს, რომ სანქციების მოხსნის ან შეთანხმებების გაფორმების საპასუხოდ რუსეთი შემხვედრ ნაბიჯებს არ დგამს. პირიქით, ფულის შოვნის შესაძლებლობის შესახებ ყოველ სიგნალს ისინი აღიქვამენ როგორც მტკიცებულებას, რომ ომზე გაკეთებული ფსონი მუშაობს და ომის გაგრძელება შესაძლებელია“, — განაცხადა უკრაინის პრეზიდენტმა.
მისი თქმით, ომი გრძელდება „სწორედ რუსეთის ამ პოზიციის გამო და არა იმიტომ, რომ უკრაინა სამართლიანად იცავს საკუთარ თავს“.
ზელენსკი ამტკიცებს, რომ იმისთვის, რათა მშვიდობას შანსი ჰქონდეს, ზეწოლა სწორედ რუსეთზე უნდა განხორციელდეს.
ტრამპის „ენერგეტიკული ზავი“
დონალდ ტრამპმა რუსეთსა და უკრაინას შორის „ენერგეტიკული ზავის“ შესახებ 11 ოქტომბერს განაცხადა. ჟურნალისტების კითხვაზე, დაეთანხმნენ თუ არა ამას დაპირისპირებული მხარეები, მან უპასუხა:
„ისინი დათანხმდნენ. იცით, რატომ? იმიტომ, რომ მე ვთქვი, რომ ისინი დათანხმდნენ. სწორედ ამიტომ დათანხმდნენ — იმიტომ, რომ მე ასე ვთქვი“.
ამასთან, ვოლოდიმირ ზელენსკიმ განაცხადა, რომ ზავის შესახებ ტრამპის სოციალური ქსელის პოსტიდან შეიტყო.
მას შემდეგ უკრაინას არ დაუდასტურებია თავდასხმები რუსეთის ნავთობგადამამუშავებელ ქარხნებზე. რუსეთი კი, თავის მხრივ, უკრაინის ენერგეტიკულ ობიექტებზე მასშტაბურ დარტყმებს აგრძელებდა. კრემლში ეს „ენერგეტიკული ზავის“ პირობებთან დაკავშირებით კონკრეტიკის არარსებობით ახსნეს.
15 ოქტომბერს Financial Times-თან ინტერვიუში ზელენსკიმ გააფრთხილა, რომ უკრაინელი სამხედროები ნავთობგადამამუშავებელ ქარხნებზე დარტყმებს განაახლებენ, რადგან რუსეთი უკრაინის ენერგეტიკულ ინფრასტრუქტურაზე თავდასხმებს აგრძელებს.
„საკმარისია, რაც ავიტანეთ“, — განაცხადა მან.