30-მდე ოპოზიციურმა პარტიამ არჩევნებში ერთმენეთის ხმების დასაცავად მემორანდუმს ხელი მოაწერა. პარტიები თანმხდებიან, რომ ერთმანეთის ხმების ჩართვაში ყველა უნდა ჩაერთოს და “ქართულ ოცნებას” არჩევნების გაყალბების საშუალება არ უნდა მისცეს.
ნინო ბურჯანაძის განმარტებით, შეიქმება კონკრეტული შტაბი, არჩევნების დღეს იმუშავებს ქოლცენტრი და პოლიტიკური ორგანიზაციები კოორდინირებულად იმოქმედებენ.
„მსგავსი შემთხვევა საქართველოს პოლიტიკურ ცხოვრებაში არ მომხდარა, როდესაც სრულიად განსხვავებული ხედვების, სრულიად განსხვავებული შეხედულებების, განსხვავებული ადამიანური და პოლიტიკური სიმპატიების ან ანტიპატიების მქონე პარტიები დავსხედით ერთად და მივიღეთ გადაწყვეტილება, რომ არავის მივცეთ უფლება 2020 წლის არჩევნების გაყალბების და მანიპულირების. ეს არის ნამდვილად სიგნალი ხელისუფლებისთვის, რომ არ გაბედოს არჩევნების გაყალბება. წინააღმდეგ შემთხვევაში ყველა ოპოზიციური პარტია დაირაზმება არჩევნების გაყალბების წინააღმდეგ. აქ ვეღარ მოხერხდება ის, რაც 2016 წელს შეძლო ბიძინა ივანიშვილმა, როდესაც მაგალითად, ჩემი პოლიტიკური ორგანიზაციის ხმები გადაანაწილა – ზოგი თავად გადაილაგა და ზოგი სატელიტ ოპოზიციურ პარტიებს გადასცა. ჩვენ შევთანხმდით, რომ ყველანი დავიცავთ ერთმანეთის ხმებს“, – განაცხადა ბურჯანაძემ.
მისი თქმით, არჩევნების პერიოდში იმუშავებს ქოლცენტრი, სადაც დარღვევების შემთხვევებში პარტიის წარმომადგენლები მიაწვდიან ინფორმაციას.
„ჩვენ დღეს კონკრეტული მექანიზმის შექმნაზე ვიმსჯელებთ. უკვე მონახაზი ჩამოყალიბებული გვაქვს. შეიქმნება კონკრეტული შტაბი, რომელიც არჩევნებამდე რამდენიმე დღით ადრე დაიწყებს მუშაობას და იმუშავებს ქოლცენტრი, სადაც დარღვევების შესახებ გადმოაგზავნიან ინფორმაციას და შესაბამისად ყველა პოლიტიკური ორგანიზაცია კოორდინირებულად იმოქმედებს. ამ შტაბში წარმოდგენილი იქნება ყველა პარტიის წარმომადგენელი“, – განაცხადა ნინო ბურჯანაძემ.
ოპოზიცია აცხადებს, რომ “ქართულ ოცნებასთან” რაიმე დოკუმენტის გაფორმება ოპოზიციის მხრიდან შეუძლებელია.
“30-მდე ოპოზიციური პარტია, პრაქტიკულად სრული სპექტრი თანხმდება ერთმანეთის ხმების დაცვაზე და თანმხდება იმას, რომ ერთობლივი ძალისხმევით არ დაუშვებს არჩევენების გაყალბებას. რა თქმა უნდა, ეს არის ძალიმ მძლავრი სიგნალი ოპოზიციის ერთობის შესახებ, ამ დოკუმენტს აქვს პრაქტიკული ღირებულება და მასში ასახული იქნება მექანიზმები, რომლითაც ოპოზიცია ხმებს დაიცავს”, – თქვა “ერვოპული საქართველოს” წვერმა, დავით ბაქრაძემ
