მე მინუსად ჩამითვალეს, როცა ვთქვი, რომ ვერ მივცემ რეკომენდაციას, რამე რელიგიური რიტუალი შეიცვალოს, – ამის შესახებ „TV პირველის“ ეთერში დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.
ამირან გამყრელიძის განცხადებით, ის აპირებს ილია მეორეს შეხვდეს და ვირუსის პრევენციის გზებზე ესაუბროს.
„მაქვს ეს ბედნიერება, რომ გარკვეული პერიოდით მქონდეს პირადი კონტაქტი მის უწმინდესობასთან, პატრიარქთან. ეს ადამიანი ბრძენია. ის ყოველთვის მარიგებს. როდესაც ეს ვირუსი დაიწყო მსოფლიოში მე საპატრიარქოს დავუკავშირდი პირადად.ზოგადი ჰიგიენური წესების დაცვა გულისხმობს ხშირად ხელების დაბანას, სველი წესით დალაგებას. დეზინფექციას, იმას, რომ ერთჯერადად გამოვიყენოთ პირბადეები, ჭიქა, თუ საინექციო საშუალებები. ეს არის ჩემი რეკომენდაცია ყველასადმი, საპატრიარქოსადმი, ეკლესიისადმი. ეკლესიას ისიც კი შევთავაზე, რომ როცა მრევლი იკრიბება, იქნებ ეკლესიამ მოახერხოს, რომ იქ დისპენსერები იდგეს, სადაც შესვლის და გამოსვლის წინ ჩვენ ხელებს დავიბანთ“, – განაცხადა ამირან გამყრელიძემ.
