Anonymous–ის სახელით ცნობილმა ჰაკერების ჯგუფმა სპეციალურ საიტზე გამოაქვეყნა მონაცემები, რომლებიც ლიპეცკის სამხედრო მექანიკური ქარხნიდან მოიპარეს. ჰაკერებმა გადმოსაქაჩად დადეს ელექტრონული წერილები, რომელთა საერთო მოცულობაა 25 GB. ფაილების მიხედვით, წერილები ეკუთვნის ქარხნის დიერქტორის მოადგილეს, ვენიამინ სიზოვს, წარმოების დირექტორს, ევგენი მასანინს, პერსონალის დირექტორს ალექსანდრ სეროვს და საწარმოს სხვა ხელმძღვანელებს. ფაილი PST ფორმატით დევს, რომელშიც წერილების ასლები სერვერებზე ან კომპიუტერში ინახება.
რა ვიცით ლიპეცკის მექანიკური ქარხნის შესახებ
ლიპეცკის ქარხანა საზენიტო–სარაკეტო კომლექსების, ПВО С-300В4–ის ერთ–ერთი მსხვილი მწარმოებელია.
ოფიციალური საიტის მიხედვით, ლიპეცკის მექანიკური ქარხანა რუსული სამხედრო ტექნიკის წარმოებით და გაყიდვით, ასევე რემონტით, ტექნიკური მომსახურებით და შეიარაღების მონტაჟით არის დაკავებული. კერძოდ, იქ იწარმოება თვითმავალი ძარები სარაკეტო კომპლექს С-300В4–სთვის, ასევე იწარმოება სხვადასხვა ნაწილები სხვა საწარმოებისთვის, სადაც შემდგომში საბრძოლო ტექნიკის, მათ შორის ტანკების დამზადება ხდება.
ქარხანაში მზადდება კაბელებიც, ხდება დეტალების მექანიკური დამუშავება, ასევე მასალების ქიმიურ–თერმული და გალვანური დამუშავება–დაფარვა.
მანამდე ანონიმუსის ჰაკერებმა რუსეთის ცენტრობანკის სისტემა გატეხეს და გამოაქვეყნეს მონაცემები, რომლებიც რუსეთის მთავარი რეგულატორის სერვერზე ინახებოდა.
ასევე იწერებოდა, რომ ანონიმუსმა როსავიაციის IT ინფრასტრუქტურაც “გატეხა“ და გაანადგურა დოკუმენტები, ელექტრონული წერილები და სხვადასხვა ფაილები. მედიის ინფორმაციით, ჩინოვნიკებს მონაცემების სარეზერვო ასლები არ აღმოაჩნდათ, რადგან მათ კოპირებაზე ფული არ გამოიყოფოდა.
