ჩინეთს, რომელიც მსოფლიოში პლასტმასის ერთ-ერთი ყველაზე დიდი მწარმოებელი და მომხმარებელია, ერთჯერადი პლასტმასის შემცირების ახალი გეგმები აქვს. მთავრობამ 5-წლიანი სამოქმედო გეგმა შეიმუშავა.
ჩინეთის დიდ ქალაქებში 2020 წლიდან არადეგრადირებადი ჩანთები აიკრძალება, 2022 წლიდან კი ყველა სხვა ქალაქში. აკრძალვა შეეხება პლასტიკური პარკების წარმოებასა და რეალიზაციას, რომელიც 0,025 მმ-ზე ნაკლები იქნება.
გარდა ამისა, სარესტორნო ინდუსტრია 2020 წლიდან კოქტეილის ჩხირებს , ე.წ. საწრუპებს ვეღარ გამოიყენებს. რესტორნებს ერთჯერადი ნივთების 30%-ით შემცირებაც დაევალებათ.
BBC-ს ინფორმაციით, ჩინეთი უკვე წლებია საყოფაცხოვრებო ნარჩენებს ებრძვის , რომელსაც მისი 1.4 მილიარდი მოსახლე ქმნის.
ჩინეთის ყველაზე დიდი ნაგავსაყრელი, რომელიც 100 საფეხბურთო მოედნის ზომისაა, გეგმიდან 25 წლით ადრე უკვე გაივსო. მხოლოდ 2017 წელს ქვეყანამ 215 მილიონი ტონა ნაგავი შეაგროვა, რისი გადამუშავებაც ჯერჯერობით ვერ ხერხდება.
