მას შემდეგ, რაც ჩინეთმა კარანტინი გააუქმა ქვეყანაში შეიძლება კორონავირუსის ეპიდემიის ახალი ტალღა დაიწყოს. ამის შესახებ აშშ–ს ალერგიისა და ინფექციური დაავადებების ნაციონალური ინსტიტუტის ხელმძღვანელმა, ენტონი ფაუჩიმ ეი ბი სი–ს ეთერში განაცხადა. მისი აზრით, მეორადი დაინფიცირების საშიშროება ჩინეთის ცხოვრების ნორმალურ რიტმში დაბრუნების შემდეგ იზრდება.
“იმის მიხედვით, თუ როგორ მოხსნიან შეზღუდვებს და როგორ დაუბრუნდებიან ნორმალურ ცხოვრებას, შეიძლება დაინფიცირების მეორე ტალღა გაჩნდეს. იმედი მაქვს ეს არ მოხდება“– თქვა მან.
მეცნიერმა ასევე აღნიშნა, რომ აშშ–ში ეპიდემია შეიძლება რამდენიმე თვე გაგრძელდეს. ეს ძირითადად ინფექციის გავრცელებაზე კონტროლის ზომების ეფექტურობაზე იქნება დამოკიდებული. “ეს იქნება რამდენიმე კვირა ან რამდენიმე თვე. თუ გინდათ იცოდეთ როგორი იქნება დინამიკა შეხედეთ ჩინეთს და სამხრეთ კორეას. ჩინეთში სიტუაცია პიკამდე მივიდა და შემდეგ მაჩვენებლების კლება დაიწყო. რამდენიმე დღის წინ იქ ერ თდღეში სულ 11 შემთხვევა დარეგისტრირდა, რაც უკიდურესად დაბალი მაჩვენებელია იმასთან შედარებით, რაც იქ ხდებოდა“– ამბობს ფაუჩი.
ამ დროისთვის კორონავირუსის ეპიდემია მსოფლიოს 142 ქვეყანას მოედო.
