ბრიტანეთში შემუშავებული ვაქცინების მოქმედების შესამოწმებლად მეტი მოხალისე 65 წელს გადაცილებული ადამიანი და ეთნიკური უმცირესობების წევრები ესაჭიროებათ. ამის შესახებ ვაქცინის შემქმნელი ოქსფორდის ჯგუფის მთავარმა მკვლევარმა, მანეში რამასამიმ განაცხადა.
მეცნიერები უნდა დარწმუნდნენ, რომ ვაქცინები მოსახლეობის ყველა კატეგორიისთვის ეფექტური იქნება.
ჯერჯერობით 250 000 ადამიანიდან, რომლებიც მოხალისეებად ჩაეწერნენ ეთნიკური უმცირესობის წარმომადგენლები 7%–ს შეადგენენ.
ამასთან, ჯერჯერობით დაუდგენელი მიზეზებით მათ კორონავირუსი უფრო მძიმედ გადააქვთ და მათ შორის სიკვდილიანობის დონე უფრო მაღალია. ამიტომაც, რამასამის თქმით, მასობრივი ვაქცინაციის დაწყების მომენტისთვის მნიშვნელოვანია დარწმუნება, რომ ის ეფექტური იქნება სწორედ ამ ჯგუფებისთვის.
მკვლევარები ტესტირების მონაწილეთა რაოდენობის 500 000–მდე გაზრდას გეგმავენ. ამჟამად ბრიტანეთში შემოწმების სხვადასხვა სტადიაზეა ვაქცინის 6 ტიპი.
