ინფექციური საავადმყოფოს სამედიცინო დირექტორის, მარინა ეზუგბაიას ინფორმაციით, პაციენტის მდგომარეობა, რომელსაც კორონავირუსი დაუდგინდა, წინა სამ შემთხვევასთან შედარებით უფრო მძიმეა.
როგორც ეზუგბაიამ ჟურნალისტებს განუცხადა, მას მაღალი ტემპერატურა აღენიშნება და ამ დროისთვის ინფექციურ საავადმყოფოში მკურნალობს.
„განსხვავებით წინა სამი შემთხვევისგან, ამ პაციენტის მდგომარეობა უფრო მძიმეა, კლინიკურად უფრო მძიმე ფორმაა, რადგან დაავადება გამოუვლინდა ტემპერატურის მატებით – 38,5-ზე მეტია ტემპერატურა. დიაგნოსტირებულია, ლაბორატორიულად დადასტურებულია, დაწყებულია მკურნალობა. გუშიდელი დღის შემდეგ მდგომარეობა ჯერჯერობით კვლავ მძიმედ რჩება, მაგრამ სტაბილურია“, – განაცხადა ინფექციური საავადმყოფოს სამედიცინო დირექტორმა.
შეგახსენებთ, რომ საქართველოში კორონავირუსის მეოთხე შემთხვევა დადასტურდა. ვირუსი საქართველოს მოქალაქე 45 წლის მამაკაცს დაუდგინდა, რომელიც ქვეყანაში იტალიიდან შემოვიდა და თვითიზოლაციაში იმყოფებოდა.
