ასიათასზე მეტი პროტესტანტი შეიკრიბა პრაღაში, ვაცლავის მოედანზე სამშაბათს და პრემიერ მინისტრის, ანდრეი ბაბიშის გადადგომა მოითხოვა, რომელსაც ევროკავშირის დოტაციის უკანონო გამოყენებაში ადანაშაულებენ.
აქციის ორგანიზატორების თქმით მასში 120 000 ადამიანი მონაწილეობდა. თუ ეს ინფორმაცია ოფიციალურად დადასტურდა, ეს იქნება ყველაზე მასობრივი პროტესტი ჩეხეთში 1989 წლის “ხავერდის რევოლუციის“ შემდეგ, რომელსაც შედეგად ჩეხეთის საბჭოთა სოციალისტური რესპუბლიკის პრეზიდენტად ვაცლავ ჰაველის არჩევა მოჰყვა.
პრემიერი ბაბიში უარყოფს ბრალდებებს უფლებამოსილების გადაჭარბების შესახებ მიუხედავად იმისა, რომ მედიაში გავრცელდა ევროკავშირის ანგარიშის შავი ვერსია, რომლის ავტორები ჩეხეთისთვის გამოყოფილი სუბსიდიების უკან დაბრუნებას ითხოვენ.
ჯგუფმა “მილიონი მომენტი დემოკრატიისთვის“ მასობრივი პროტესტის ორგანიზება აპრილის ბოლოდან დაიწყო.დაახლოებით ათი დღის წინ ვაცლავის მოედანზე აქციაზე 50 000 ადამიანი გამოვიდა.
5 ივნისს კი ორგანიზატორების თქმით პროტესტს ორჯერ მეტი ადამიანი შეუერთდა. პროტესტანტებს ხელში ეჭირათ ბაბიშის პორტრეტები წარწერით: “წადი“. სცენაზე გამომსვლელები პრემიერს არაერთ დანაშაულში სდებდნენ ბრალს.
ყოფილი კომუნისტი, ანდრეი ბაბიში ჩეხეთში რიგით მეორე ყველაზე მდიდარი ადამიანია. ის ხელისუფლებაში 2017 წელს პოპულისტურ პარტია ANO–სთან ერთად მოვიდა, ევროსკეპტიციზმის პლატფორმით და ანტიკორუფციული დაპირებებით.
მიუხედავად ბაბიშის გადაგომის მოთხოვნით დაწყებული კამპანიისა მისმა პარტიამ გასულ კვირას ევროპარლამენტის არჩევნებში 21.2% მოაგროვა და პირველ ადგილზე გავიდა.
აპრილში ჩეხეთის პოლიციამ მოითხოვა ბაბიშისთვის ბრალის წაყენება ევროკავშირის სუბსიდიებთან დაკავშირებული თაღლითობის გამო. სკანდალის ფონზე ჩეხეთის იუსტიციის მინისტრი გადადგა, ახალი მინისტრი კი მარია ბენეშოვა გახდა, რომლის გადადგომასაც პროტესტანტები მოითხოვენ.
ბაბიშისგან შესაძლოა დაახლოებით 17.5 მილიონი ევროს დაბრუნება მოითხოვონ. პრემიერი ბრალდებებს “ბინძურ ტყუილს უწოდებს“ და ამბობს, რომ მიზანი ამომრჩევლის თვალში მისი იმიჯის შელახვაა.
