ფრანგული პოლიცია პარიზის ცნობილ რესტორან “როტონდაში“ შაბათს დილით მომხდარ ხანძარს იძიებს. ეს ძველი რესტორანი ცნობილია იმით, რომ იქ რეგულარულად დადის საფრანგეთის პრეზიდენტი ემანუელ მაკრონი. გამომძიებლებმა დამწვარი შენობის იატაკზე ცეცხლსაშიში სითხის კვალი აღმოაჩინეს. როგორც ფრანგული პრესა ამტკიცებს, ნაპოვნია რესტორნის სიახლოვეს მიგდებული ყვითელი ჟილეტი.
რესტორნის შეფ პოვარის, ფრანკ გონეს განცხადებით მოხდა შენობაში უცხო პირების შეღწევა, შემდეგ კი ხანძარი დაიწყო. ის დარწმუნებულია, რომ ხანძარი საფრანგეთის პრეზიდენტს უკავშირდება, თუმცა მტკიცებულებების გარეშე კონკრეტულ ბრალდებებზე საუბარი არ სურს.
პარასკევს საღამოს მაკრონის პოლიტიკის მოწინააღმდეგეებმა პარიზის თეატრში საპროტესტო აქცია გამართეს, სადაც თავად საფრანგეთის პრეზიდენტიც იმყოფებოდა. პრეზიდენტის დასაცავად ადგილზე პოლიციის გაძლიერებული შემადგენლობა მივიდა. აქციის ორგანიზატორი ოპოზიციური პარტია “დაუმორჩილებელი საფრანგეთის“ ლიდერი პოლიციამ არეულობების მზადების ბრალდებით დააკავა.
მაკრონის წინააღმდეგ პროტესტის მთავარი მიზეზი მის მიერ შეთავაზებული საპენსიო რეფორმაა, რომელიც სახელმწიფო ორგანიზაციების და საწარმოების თანამშრომელთა ინტერესებს ლახავს.
