Reuters-ის ინფორმაციით, შეერთებულმა შტატებმა ირანთან ომის დროს სახმელეთო ბაზირების შორი მოქმედების რაკეტების მარაგის მნიშვნელოვანი ნაწილი დახარჯა. ასეთი რაკეტების მცირე მარაგი აჩენს შეშფოთებას, რამდენად მზად არის ამერიკული არმია მომავალში შესაძლო შეიარაღებული კონფლიქტებისთვის, იუწყება სააგენტო აშშ-ის ადმინისტრაციაში წყაროებზე დაყრდნობით.
Reuters-ის ცნობით, საუბარია უმთავრესად შორი მოქმედების ბალისტიკურ რაკეტებზე ATACMS და მაღალი სიზუსტის ოპერატიულ-ტაქტიკურ რაკეტებზე PrSM — Precision Strike Missile. ამ შეიარაღების კონკრეტული გამოყენების დეტალები არ გასაჯაროებულა. სააგენტოს ორი წყაროს თქმით, აშშ-მა უკვე გამოიყენა სახმელეთო ჯარების შეიარაღებაში არსებული „მიწა-მიწა“ კლასის რაკეტების „თითქმის მთელი მარაგი“. წყაროებმა ზუსტი რაოდენობების დასახელებაზე უარი თქვეს.
ანალიტიკოსების შეფასებით, თითოეული ასეთი რაკეტის ღირებულება ერთ მილიონ დოლარს აღემატება და მათ შესაძლოა კრიტიკულად მნიშვნელოვანი როლი შეასრულონ ჩინეთთან ან რუსეთთან შესაძლო კონფლიქტის შემთხვევაშიც. PrSM ახალი, გაუმჯობესებული თაობის რაკეტებია, რომლებმაც შედარებით მცირე მოქმედების რადიუსის მქონე ATACMS უნდა ჩაანაცვლოს.
დახარჯულია Tomahawk-ისა და Patriot-ის რაკეტების მნიშვნელოვანი ნაწილიც
ამასთან, Reuters-ის კიდევ ერთი ანონიმური წყაროს თქმით, ირანში ომის დაწყების შემდეგ შეერთებულმა შტატებმა თითქმის ნახევარი დახარჯა იმ Tomahawk-ის ფრთოსანი რაკეტების მარაგისა, რომლებიც მსოფლიოს სხვადასხვა სამხედრო ბაზაზე ინახება და აშშ-ის სამხედრო-საზღვაო ძალების გემებიდან და წყალქვეშა ნავებიდან ხდება გაშვება.
მნიშვნელოვნად შემცირდა თავდაცვითი შეიარაღების მარაგებიც, მათ შორის Patriot-ის საჰაერო თავდაცვის სისტემების რაკეტა-გადამჭრელები და THAAD-ის სარაკეტო თავდაცვის სისტემების რაკეტები.
სააგენტო სტრატეგიული და საერთაშორისო კვლევების ცენტრის — CSIS-ის — მონაცემებსაც იშველიებს, რომელთა მიხედვით, 2026 წლის თებერვლიდან ივლისამდე აშშ-მა Patriot-ის რაკეტა-გადამჭრელების დაახლოებით 65% დახარჯა, ხოლო THAAD-ის მარაგი სულ მცირე 38%-ით შემცირდა. Reuters-ის ორ წყაროს თქმით, ეს მონაცემები ამერიკის ადმინისტრაციის შიდა ინფორმაციას შეესაბამება.
ამასთან, აშშ-ის პრეზიდენტი დონალდ ტრამპი უარყოფს შეშფოთებას ძირითადი შეიარაღების მარაგების შემცირების გამო. თეთრი სახლის განცხადებით, შეერთებულ შტატებს „მსოფლიოში ნებისმიერ სხვა ქვეყანაზე ბევრად მეტი საბრძოლო მასალა აქვს“ და მათი რაოდენობა „მნიშვნელოვნად აღემატება ჩვენს საჭიროებებს“.
