სომხეთის პრემიერ–მინისტრი, ნიკოლ ფაშინიანი საკუთარ “ფეისბუქ” გვერდზე აქვეყნებს გამანადგურებელი თვითმფრინავების ვიდეოს. მისი თქმით, SU–30SM–ები სომხეთის საზღვარს დაიცავენ.
“სუ-30SM-ები სამხედრო ვალდებულებას ასრულებენ, რათა უზრუნველყონ სომხეთის საჰაერო საზღვრის უსაფრთხოების დაცვა”,– წერს ფაშინიანი.
ცნობისთვის, სომხეთსა და აზერბაიჯანს შორის დაპირისპირება კვირას, 12 ივლისს ტავუშისა და ტოვუზის რეგიონებს შორის მდებარე საზღვართან დაიწყო. ქვეყნები ცეცხლის გახსნაში ერთმანეთს ადანაშაულებენ.
შეტაკებები მეოთხე დღეა გრძელდება. გუშინ 7 აზერბაიჯანელი სამხედრო და ერთი სამოქალაქო პირი დაიღუპა. სომხეთის მხარეს – ორი სომეხი სამხედრო.
აზერბაიჯანის მხარეს დაღუპულებს შორის ერთი გენერალ-მაიორი, ერთი კი პოლკოვნიკია. ორი დღეა აზერბაიჯანში სომხეთთან ომის დაწყებას ითხოვენ. დემონსტრანტები პარლამენტის შენობაში შეიჭრნენ, ასევე, დააზიანის პოლიციის მანქანები.
სამართლდამცველებმა მოსახლეობის წინააღმდეგ წყლის ჭავლი და რეზინის ხელკეტები გამოიყენეს. დაკავებულია აქციის ათობით მონაწილე. აქციის მონაწილეები ხელისუფლებას თოუზის რეგიონში სომხეთის მხრიდან განხორციელებულ თავდასხმაზე შესაბამისი რეაგირებისკენ მოუწოდებდნენ.
