მსახიობ ლეა ახეჯაკოვას წინააღმდეგ გამოძიება რუსული არმიის „დისკრედიტაციის“ მუხლით დაიწყო, იუწყება რუსული სახელმწიფო სააგენტო TASS სამართალდამცავ ორგანოებში ანონიმურ წყაროზე დაყრდნობით.
უწყების ცნობით, შემოწმება განპირობებულია იმით, რომ ლია ახეჯაკოვა მანამდე გერმანიაში სცენაზე უკრაინის დროშით ავიდა. ივლისის ბოლოს ლია ახეჯაკოვამ ბრემენში ითამაშა სპექტაკლში “ჩემი შვილიშვილი ბენიამინი”. სპექტაკლის შემდეგ ის სცენაზე უკრაინის დროშით ავიდა. მაყურებელი მიესალმა მსახიობის ამ საქციელს და ისმოდა შეძახილები “მადლობა!”.
სოციალურ ქსელებში ფართოდ გავრცელდა ახეჯაკოვას ბრემენის სცენაზე უკრაინის დროშით გამოჩენის ამსახველი ფოტოები და ვიდეო. ამის შემდეგ, ვიტალი ბოროდინმა, უსაფრთხოებისა და კორუფციასთან ბრძოლის ფედერალური პროექტის ხელმძღვანელმა, სთხოვა რუსეთის ფედერაციის გენერალურ პროკურორს, შეემოწმებინა 85 წლის მსახიობი რუსული არმიის „დისკრედიტაციის“ მუხით და ასევე მოუწოდა, მას ყველა ტიტული და ჯილდო ჩამოერთვას.
მანამდე ბოროდინმა ლია ახჯაკოვას წინააღმდეგ საქმის აღძვრა მოითხოვა ღალატის მუხლით. ვიტალი ბოროდინი რეგულარულად წერს იმ ადამიანების წინააღმდეგ, რომლებსაც ის რუსეთის ხელისუფლების მოწინააღმდეგეებად თვლის. ასე რომ, მან მოითხოვა, რომ გენერალურ პროკურატურას შეემოწმებინა მსახიობი დანილ კოზლოვსკი ჯარის „დისკრედიტაციის“ მუხლით. მან ასევე მოითხოვა მომღერალ ალა პუგაჩოვას შემოწმება უკრაინის შეიარაღებული ძალების დაფინანსებისთვის. რუსულ თეატრებში ლია ახეჯაკოვა, რომელიც ღიად ეწინააღმდეგებოდა რუსეთის შეჭრას უკრაინაში, ამჟამად არ თამაშობს. ომის დაწყებიდან, მისი მონაწილეობით ყველა სპექტაკლი რეპერტუარიდან ამოიღეს. აპრილში ერთა თეატრმა გააუქმა “უკანასკნელი ანგელოზის ზღაპარის” ორი სპექტაკლი, რომელშიც ლია ახეჯაკოვა თამაშობდა. იმ დროს ეს მისი მონაწილეობით რუსეთში დარჩენილი ბოლო სპექტაკლი იყო.
