ფლორიდის შტატის პოლიცია იუწყება, რომ დააკავეს პირი, რომელმაც, სავარაუდოდ, გადაყლაპა Tiffany & Co-ს საიუველირო მაღაზიიდან მოპარული საყურეები, რომელთა ღირებულება 769,5 ათას დოლარს შეადგენს.
პოლიციის ცნობით, 32 წლის ჯეიტან გილდერმა მაღაზიის თანამშრომლები მოატყუა, რომ “პროფესიონალ სპორტსმენთან” მუშაობდა, რათა მათ ძვირადღირებული ნივთები ეჩვენებინათ მისთვის.
ამის შემდეგ, მან საყურეები მოიპარა და მაღაზიიდან გაიქცა.
პოლიცია აღნიშნავს, რომ ის იმავე დღეს დააკავეს და დაკავების მომენტში დაინახეს, როგორ გადაყლაპა მან რამდენიმე ნივთი, რომლებიც, სავარაუდოდ, მოპარული საყურეები იყო.
გილდერს ასევე ეჭვმიტანილად მიიჩნევენ იმაში, რომ სურდა ბრილიანტის ბეჭდის მოპარვაც, თუმცა იგი მაღაზიიდან გაქცევისას დაუვარდა.
პოლიციამ მოგვიანებით გაასაჯაროვა საექსპერტო გამოკვლევის (რენტგენის) სურათი, რომელზეც დაკავებულის კუჭში უცხო სხეული ჩანს.
შეკითხვაზე, დაუბრუნდა თუ არა მოპარული საყურეები მეპატრონეს, ორლანდოს პოლიციამ კომენტარზე უარი განაცხადა.
ამერიკული პოლიციის მონაცემებით, გილდერმა 2022 წელს უკვე გაძარცვა Tiffany & Co-ს მაღაზია ტეხასში, ხოლო კოლორადოს შტატში მის სახელზე 48 დაკავების ორდერია გაცემული.
მის წინააღმდეგ წაყენებულია ბრალდება ნიღბის გამოყენებით ძარცვისა და განსაკუთრებით დიდი ოდენობით ქურდობისთვის.
