ზურაბიშვილი მსჯელობს როგორც სახელმწიფოს მეთაური და ის, რომ მისი პოზიცია ოპოზიციის აზრს დაემთხვა, არ ნიშნავს, რომ პრეზიდენტი ოპოზიციონერია – ასე შეაფასა ექსპერტმა გია ხუხაშვილმა საქართველოს პრეზიდენტის, სალომე ზურაბიშვილის განცხადებები, მათ შორის 19 აპრილის დოკუმენტის შესრულების აუცილებლობასთან დაკავშირებით.
„ძალიან კრიტიკულად ვიყავი ყოველთვის პრეზიდენტის მიმართ განწყობილი, მაგრამ გუშინდელი გამოსვლა ჩემთვის იყო ძალიან სასიამოვნო სიურპრიზი. აბსოლუტურად სწორი აქცენტები იყო დასმული, სწორი შეფასებები და ამით ვარ ძალიან კმაყოფილი.
გასაგებია, რომ ჩვენი პოლიტიკური ელიტა მუდმივად უყურებს შიდა პოლიტიკურ ჭრილში ყველაფერს, მაგრამ პრეზიდენტმა გუშინ რა პოზიციაც გაახმოვანა, ეს არ არის ოპოზიციის პოზიცია, ეს არის ევროკავშირის, შარლ მიშელის პატივისცემა. ბევრად უფრო დიდ სურათში შევხედოთ – პრეზიდენტმა თქვა მარტივი რაღაცა, რომ არის ხელმოწერილი დოკუმენტი, რომელიც უნდა შესრულდეს. ის, რომ მაშინ მომწონდა და ახლა აღარ მომწონს, ასეთი რაღაცები წარმოუდგენელია. მან თქვა კიდევაც, რომ წითელი ხაზების გავლება ხდება ხელშეკრულების დადებამდე. ხელშეკრულება რომ დაიდო, იმას სჭირდება აღსრულება, ეს არის უნივერსალური კანონი. პრეზიდენტი ამბობს იმას, რასაც ფიქრობს. ის რომ მისი აზრი დაემთხვა ოპოზიციის აზრს, სულაც არ ნიშნავს, რომ ოპოზიციონერია. ამიტომ არის, ჩემი აზრით, მისი გუშინდელი ნაბიჯი პატივსაცემი, რომ ის არა პოლიტიკური კონიუნქტურით მსჯელობდა გუშინ, არამედ მსჯელობდა როგორც სახელმწიფოს მეთაური, რაც მისი კონსტიტუციური მოვალეობაა,“- განაცხადა ხუხაშვილმა.
