თუ გსურთ ნახოთ, რამდენად მცდარი იყო პუტინის ყველა ვარაუდი, შეხედეთ ბრძოლის ველს და მიმოიხედეთ ამ ოთახში – ასე დაიწყო,შეერთებული შტატების თავდაცვის მდივანმა, ლოიდ ოსტინმა ბრიუსელში (ბელგია) უკრაინის თავდაცვის საკონტაქტო ჯგუფის (ე.წ. „რამშტეინ-6“) შეხვედრაზე სიტყვით გამოსვლა.
“ჩვენ დღეს კვლავ შევიკრიბეთ და კვლავ გვაერთიანებს მტკიცე გადაწყვეტილება, დავეხმაროთ უკრაინას თავისი სუვერენიტეტის, ტერიტორიისა და ხალხის დაცვაში რუსეთის უსამართლო და არაპროვოცირებული თავდასხმისგან. მთელმა მსოფლიომ კიდევ ერთხელ დაინახა პუტინის მიერ არჩეული ომის ბოროტება და სისასტიკე.
უკრაინის ქალაქების წინააღმდეგ რუსეთის ბოლო თავდასხმამ კვლავ გამოიწვია უდანაშაულო მშვიდობიანი მოქალაქეების სიკვდილი. მათ სამიზნეებს არ ჰქონდა სამხედრო დანიშნულება. თუმცა, რუსეთის უკანასკნელმა თავდასხმებმა მხოლოდ გააძლიერა უკრაინელი ხალხის მონდომება და კიდევ უფრო გააერთიანა უკრაინის მიმართ კეთილგანწყობილი ქვეყნები დედამიწის ყველა რეგიონში.
ასე რომ, ჩვენ დღეს ისევ ვიკრიბებით, რათა მხარი დავუჭიროთ უკრაინის უფლებას, დაიცვას საკუთარი თავი.
ახლა ყველას ესმის, როგორ დაიწყო ეს ომი. როგორც პრეზიდენტმა ბაიდენმა აღნიშნა, „რუსეთს არავინ დამუქრებია და რუსეთის გარდა არავინ ცდილობდა კონფლიქტის გამოწვევას“.
პუტინმა ომი აირჩია. მაგრამ უკრაინამ აირჩია თავის დაცვა და ის ამას ბრწყინვალედ აკეთებს.
პუტინმა ივარაუდა, რომ მის ძალებს შეეძლოთ სწრაფად დაეპყროთ მთელი უკრაინა. მან ივარაუდა, რომ შეეძლო კიევში ჩასვლა. მან ივარაუდა, რომ უკრაინა ვერასოდეს განახორციელებდა კონტრშეტევას ხარკოვსა და მის ფარგლებს გარეთ საკუთარი სუვერენული ტერიტორიის დასაბრუნებლად. მან ივარაუდა, რომ მსოფლიო მშვიდად იჯდებოდა, როდესაც ის ცდილობდა უკრაინის ოთხი დამატებითი რეგიონის ანექსიას. და მან ჩათვალა, რომ ჩვენ არ გავერთიანდებოდით და წინ არ აღვუდგებოდით მის მიერ არჩეულ იმპერიულ ომს.
ქალბატონებო და ბატონებო, თუ გსურთ ნახოთ, რამდენად მცდარი იყო ყველა ეს ვარაუდი, უბრალოდ შეხედეთ დღეს ბრძოლის ველს და უბრალოდ მიმოიხედეთ ამ ოთახში.
ახლა პუტინი ცდილობს მეტი ძალების მობილიზებას და უკრაინის სუვერენული ტერიტორიების რუსეთისთვის მიერთებას. ის ებრძვის უკრაინის ქალაქებში სამოქალაქო ობიექტებსა და ინფრასტრუქტურას და ის იყენებს უპასუხისმგებლო მუქარას და რიტორიკას.
მაგრამ ჩვენ ვრჩებით ერთიანები, კონცენტრირებულები და მტკიცენი.
როდესაც ჩვენ გასულ თვეში შევხვდით ერთმანეთს, საკონტაქტო ჯგუფმა თავის თავზე აიღო ვალდებულება, შეენარჩუნებინა უკრაინის თავდაცვისუნრიანობა დიდი ხნის განმავლობაში. და ეს არის ზუსტად ის, რასაც ჩვენ დღეს ვაკეთებთ. ასე რომ, ეს საკონტაქტო ჯგუფი ერთიანი და მტკიცეა. ჩვენ გავაგრძელებთ უკრაინის თავდაცვითი შესაძლებლობების გაზრდას – დღევანდელი გადაუდებელი საჭიროებებისთვის და გრძელვადიან პერსპექტივაში.
ორი კვირის წინ, შეერთებულმა შტატებმა გამოაცხადა 1,1 მილიარდი დოლარის ოდენობის დახმარების პაკეტი უკრაინისთვის, მისი უსაფრთხოების გაძლიერების ფარგლებში. ეს მოიცავდა დამატებით 18 HIMARS-სა და სარაკეტო საბრძოლო მასალებს – ასევე ასობით მანქანას, ათეულობით რადარს, მრავალ უპილოტო საფრენ აპარატსა და ბევრ სხვას. მხოლოდ გასულ კვირას, პრეზიდენტმა ბაიდენმა დაამტკიცა 22-ე პაკეტი, რათა სწრაფად მივაწოდოთ უკრაინას უფრო მეტი სისტემა, რომელიც დაეხმარება მას წარმატების მიღწევაში ბრძოლის ველზე. პაკეტში შედის კიდევ ოთხი HIMARS, კიდევ 16 M777 ჰაუბიცა, კიდევ 75000 ტყვია 155 მილიმეტრიანი საბრძოლო მასალა და სხვა.
და ჩვენ სულ უფრო მეტად ვიზრუნებთ იმისთვის, რომ მხარი დავუჭიროთ უკრაინის თავდაცვის საჭიროებებს მომავალი რთული თვეებისა და წლების განმავლობაში.
ასე რომ, მე მოუთმენლად ველოდები ჩვენი მუშაობის გაგრძელებას გრძელვადიან ინვესტიციებზე – წარმოების, თავსებადობისა და მდგრადი შესაძლებლობების გაუმჯობესების მიზნით” – განაცხადა ლოიდ ოსტინმა.
