სამედიცინო ნიღბების და რესპირატორების ბუმმა მოდის დიზაინერებიც იძულებული გახადა აქტუალურ პროდუქტზე მუშაობა დაეწყოთ და უტილიტარული და გარეგნულად სრულიად არამიმზიდველი აქსესუარი მაქსიმალურად მოერგოთ მოდური სამოსისთვის.
მარკ ჯეიკობსმა ამ საქმეს კარგად გაართვა თავი. ამ დღეებში ბრენდმა ინსტაგრამზე გამოაქვეყნა ფოტო, რომელზე ასახულმა რესპირატორმა შესაძლოა ეპიდემიის გადავლის შემდეგაც არ დაკარგოს მიმზიდველობა.
ფრანგულმა ბრენდმა, Marine Serre–მ ჯერ კიდევ თებერვლის ბოლოს პარიზის მოდის კვირეულზე საკუთარი მოდელები პოდიუმზე დამცავი ნიღბებით გამოიყვანა. ტანსაცმლის გარდა მათ სხვადასხვა, ტანსაცმლის შესაბამისი ფერის და დიზაინის ნიღბები წარადგინეს.
ეს პირველი შემთხვევა არ არის, როცა ეს დიზაინერი საკუთარ კოლექციაში ნიღბებს იყენებს. მან სექტემბერში გამართულ ჩვენებაშიც გამოიყენა ნიღბები და თავსაბურავები, თუმცა მაშინ ამბობდა, რომ ეს არის დაბინძურებისგან დამცავი საშუალება.
საბოლოოდ კი აღმოჩნდა, რომ მან დროს გაუსწრო.
