ნობელის ლაურეატიც რომ იყოს, მაინც სამარცხვინო ამბავია – ასე ეხმაურება, ლელოს დეპუტატი სალომე სადამაშვილიმ სახალახო დამცველის, ლევან იოსელიანის გადაწყვეტილებას, რომლის მიხედვით მან თავის მოადგილედ “მოქალაქეების” ლიდერის, ალეკო ელისაშვილის დისშვილი დანიშნა.
”იოსელიანი ეტყობა იმ პირობით დანიშნეს ქოცებმა, რომ სახალხო დამცველის ინსტიტუტს უბრალოდ კი არ გაანეიტრალებდა, არამედ რაღაც კანტორად აქცევდა.
წარმოდგენა არ მაქვს, ვინაა მისი პარტიის თავმჯდომარის ნათესავი, სულ რომ ნობელის პრიზის ლაურეატი იყოს ადამიანის უფლებების დაცვის დარგში, მაინც სამარცხვინო ამბავია მისი მოადგილედ დანიშვნა.
თავისუფლად შეეძლო პირიქით, არასამთავრობო სექტორის ნდობით აღჭურვილი პირი დაენიშნა და ამით მის მიმართ უნდობლობის პრობლემა შეემსუბუქებინა.” – განაცხადა სამადაშვილმა.
შეგახსენებთ, რომ სახალხო დამცველმა, ლევან იოსელიანმა დღეს ახალი მოადგილეები წარადგინა, რომელთა შორის ერთ-ერთი, ნათია ჯულუყიძე “მოქალაქეების” ლიდერის, ალეკო ელისაშვილის დისშვილია. ის სახალხო დამცველის აპარატის ბავშვის უფლებათა დეპარტამენტის, შეზღუდული შესაძლებლობის მქონე პირთა უფლებების დეპარტამენტის, გენდერის დეპარტამენტის, თანასწორობის დეპარტამენტის, აღმოსავლეთ საქართველოს სამმართველოს, დასავლეთ საქართველოს სამმართველოს საქმიანობას გაუწევს კოორდინაციასა და ზედამხედველობას.
სახალხო დამცველის ახალი მოადგილე ნათია ჯულაყიძე ამბობს, რომ ის ლევან იოსელიანთან წლების განმავლობაში მუშაობდა და პარტია მოქალაქეების პოლიტიკური საბჭოს წევრიც იყო. ჯულაყიძე ადასტურებს, რომ ალეკო ელისაშვილის დისშვილია.
“კი, მე და ალეკო ერთი დიდი ოჯახის წევრები ვართ, ალეკო არის ჩემი ბიძა, ბიძად მეკუთვნის, მისი დისშვილი ვარ. მე უბრალოდ პარტიის ერთ-ერთი წევრი ვიყავი და იქიდან გამომდინარე, მე მანამდე, ლევანთანაც წლების განმავლობაში ვმუშაობდი, ჩვენ არასამთავრობო ორგანიზაციაში ერთად ვმუშაობდით.
აქედან გამომდინარე, მეც, როდესაც დააარსეს ეს პარტია, ჯერ როგორც აქტიური მხარდამჭერი, ისე ვეხმარებოდი და მერე როგორც უბრალოდ რიგითი წევრიც, ვიყავი პარტიის. კი, პოლიტიკურ საბჭოშიც ვიყავი.” – ამბობს ჯულაყიძე.
