პრეზიდენტმა ვოლოდიმირ ზელენსკიმ გერმანულ გამოცემა Bild-თან ინტერვიუში თქვა, რომ ერთ-ერთმა ევროპელმა ლიდერმა მოითხოვა მტკიცებულება, რომ ბუჩას ხოცვა-ჟლეტა დადგმული არ იყო. უკრაინის პრეზიდენტმა აღნიშნული ოფიციალური პირის ვინაობა არ დაასახელა.
Європейська правда-ს წყაროების ინფორმაციით, მტკიცებულებები უნგრეთის პრემიერ-მინისტრმა ვიქტორ ორბანმა მოითხოვა.
“ეს არ იყო შოლცი, მაგრამ იყო ერთი ძალიან უსიამოვნო შემთხვევა, როდესაც ევროკავშირის ერთ-ერთმა პოლიტიკოსმა თქვა – “გვიჩვენეთ მტკიცებულებები, რომ ეს მართლაც მოხდა, რომ ეს არ იყო დადგმული”, – განაცხადა ზელენსკიმ.
მედიის ცნობით, უკრაინის საგარეო საქმეთა სამინისტრომ უნგრეთი დაადანაშაულა ბუჩას ხოცვა-ჟლეტაზე რუსეთისთვის პასუხისმგებლობის არ დაკისრებაში.
ცნობისთვის, უკრაინის ქალაქ ბუჩას კონტროლის დროს რუსმა ოკუპანტებმა ასობით მშვიდობიანი მოქალაქე მოკლეს. მათი ცხედრები უკრაინულმა მხარემ ქალაქის გათავისუფლების შემდეგ ნახა. ცნობილია არასრულწლოვანთა წამებისა და გაუპატიურების ფაქტების შესახებაც.
რუსეთი ოფიციალურად უარყოფს, რომ ეს მათმა ჯარისკაცებმა ჩაიდინეს და ამტკიცებს, რომ სავარაუდოდ უკრაინის მიერ “მორიგი პროვოკაციაა”.
