დედაქალაქის მერიამ გუშინ, 15 დეკემბერს აფრიკის დასახლებაში უკანონო მშენებლობების დემონტაჟი დაიწყო, რასაც ადგილობრივების პროტესტი მოჰყვა.
სოციალურ ქსელში, შექმნილი ჯგუფის “ზამთრის მარაგის” საორგანიზაციო ჯგუფი დღეს დილიდან აფრიკის დასახლებაში იმ ოჯახების მოსანახულებლად მივიდა, რომლებსაც უკიდურეს გაჭირვებაში უწევთ ცხოვრება. სოციალურ ქსელში ისინი ადგილზე გადაღებულ ფოტოებს ავრცელებენ და აცხადებენ რომ ასე გამოიყურება, აფრიკის დასახლებაში შეხიზნული ადამიანების თავშესაფარი, რომელსაც კახა კალაძე “აგარაკებს“ უწოდებს.
“აქ ცხოვრობს ოჯახი, სადაც მცირეწლოვანი ბავშვი იზრდება. სახურავიდან – წყალი, არშემინული კედლებიდან – სიცივე შედის. იატაკად – მიწა. გასათბობად – მოძიებული ფიცრები.”
“გაინტერესებთ, როგორია აფრიკის “აგარაკები”? აი, ასეთი. ”
მოხალისეთა ჯგუფმა მათთვის საჭირო პროდუქტის აგროვება უკვე დაიწყო. მათი თქმით, დაიწყეს უსახლოდ დარჩენილი ადამიანების იდენტიფიცირება.
“ეს ის აფრიკის “აგარაკებია” სადაც ხალხი თურმე ნაგავსაყრელზე მეორე და მესამე სახლს იშენებს. დღეს “ზამთრის მარაგი” დილიდანვე მივიდა ადგილზე და იმ ოჯახების იდენტიფიცირება სცადა რომლებმაც სახლი დაკარგეს. ერთს მივაგენით სხვაგან იყო შესახლებული, ბავშვი ბეტონზე ჰყავს და გაუცივდა…
დანგრეულ ბინებზე მეტად იმ სურათმა გაგვაოცა რომელიც დაგვხვდა… 2020 წელია ფოტოებზე მიტოვებული შენობები არ გეგონოთ, აქ ხალხი ცხოვრობს უკიდურეს გაჭირვებაში.. ვისაც შეშის საშუალება აქვთ შეშით თბებიან.. ზოგს ამის შესაძლებლობაც არ აქვს…
კრიტიკულ სოციალურ მდგომარეობაში მცხოვრები ათობით ადამიანი სიცივეში ღია ცის ქვეშ აღმოჩნდა.ზამთრის მარაგის გუნდმა გადავწყვიტეთ, მათ საკვებით, თბილი ტანსაცმლით, პლედებით და სხვა საჭირო ნივთებით დავეხმაროთ, რათა ოდნავ მაინც შევუმსუბუქოთ მდგომარეობა.
ახლა ყველაზე მეტად მათ ვჭირდებით, ამიტომ ვიწყებთ კამპანიას #აფრიკისთვის!
გთხოვთ, თბილი პლედებით და ფინანსურად შემოგვეშველოთ. თანხის ჩარიცხვისას, დანიშნულებაში მიუთითეთ #აფრიკისთვის ” ნათქვამია “ზამთრის მარაგის” მიერ გავრცელებულ განცხადებაში.
ანგარიშები :
TBC – #GE94TB7880836515100041
მიმღები : ზურაბ ნიჟარაძე
საქართველოს ბანკი – #GE38BG0000000256278200GEL
მიმღები – ფლორა ფაჩულია
აფრიკის დასახლებაში ადგილობრივები აცხადებენ, რომ ისინი სახლს იშენებდნენ და ახალ წლამდე გადასვლას გეგმავდნენ. მათი ნაწილის თქმით, ქუჩაში რჩებიან და წასასვლელი არსად აქვთ, აქამდე კი ქირით და ნათესავებთან ცხოვრობდნენ. ოჯახები, რომელსაც უკვე აშენებული აქვთ სახლები, ამბობენ, რომ 18 დეკემბერს მერია დემონტაჟის განახლებას გეგმავს, ამიტომ გარეთ დარჩენის ეშინიათ.
