“ციხიდან ვმუშაობდი, როგორც ბიზნესმენი” – ამის შესახებ „ცენტრ პოინტ ჯგუფის“ საქმეზე მსჯავრდებულმა მაია რჩეულიშვილმა პენიტენციური დაწესებულების დატოვების შემდეგ ჟურნალისტებთან საუბრისას განაცხადა.
”ბიზნესში დაბრუნებას არ ვაპირებ. საქმიანობა, ალბათ, სხვაგვარ ფორმატში გაგრძელდება. ახლა ჩვეულებრივი, ყოველდღიური მუშა პროცესი დაიწყება, ჩვეული რუტინა. ეს დოკუმენტები ხომ ბოლომდეა მისაყვანი?! და ამის ჩვეულებრივი მუშა პროცესი იქნება. ახლა ინვესტორებს გადაეცათ შპს-ები და დარწმუნებული ვარ, მერიის ზედამხედველობის ფარგლებში ყველაფერი დასრულდება. 5 დიდი ობიექტია დასასრულებელი და დანარჩენი სარემონტო ობიექტებზე მიდის დამამთავრებელი სამუშაოები. მთავარია, რომ თვითონ ამ საქმის კურაცია აიღო მერიამ და მერია არის ზედამხედველი, რომელიც არის ამ საქმის დასრულების გარანტორი. ციხიდან ჩვეულებრივად ვმუშაობდი, როგორც ბიზნესმენი, ინვესტორებისთვის გადასაცემ დოკუმენტაციაზე. რაც შეეხება საპროცესო შეთანხმების გაფორმების საკითხს, საპროცესო გაფორმდა „მიონის“ ობიექტზე. „მიონის“ ობიექტის დასამთავრებელი სამუშაოები ახლა მიმდინარეობს. გრაფიკიც აქვთ მშენებლობის და აქედან გამომდინარე, ისინი ადევნებენ თვალყურს პროექტის დასრულებას. უდიდეს ბოდიშს ვუხდი ყველა დაზარალებულს დაგვიანებისთვის და ამ დაგვიანებისთვის ვიჯექი ციხეში“, – განაცხადა რჩეულიშვილმა.
ცნობისთვის, „ცენტრ პოინტის“ საქმეზე „მიონის“ ეპიზოდზე მაია რჩეულიშვილს 7 წლით თავისუფლების აღკვეთა ჰქონდა შეფარდებული.
