კვირას ღამით, რუსეთმა კიევს უპილოტო თვითმფრინავების რამდენიმე ტალღით შეუტია . მერის ვიტალი კლიჩკოს განცხადებით, ქალაქში ნამსხვრევების ჩამოვარდნის შედეგად 41 წლის მამაკაცი დაიღუპა და 35 წლის ქალი დაშავდა.
უკრაინის შეიარაღებული ძალების საჰაერო ძალებმა განაცხადეს, რომ გაშვებული იქნა 54 შაჰედი კამიკაძე დრონი, რაც რუსეთის უკრაინაში შეჭრის დაწყებიდან დრონების რეკორდული რაოდენობაა. ისინი აცხადებენ, რომ ჩამოაგდეს 52 დრონი. კიევის ქალაქის სამხედრო ადმინისტრაცია ასევე ამტკიცებს, რომ ეს იყო ყველაზე მასიური დრონების თავდასხმა დედაქალაქზე სრულმასშტაბიანი შეჭრის დაწყების შემდეგ.
დაზიანდა რამდენიმე შენობა. კლიჩკოს თქმით, დედაქალაქის სამხრეთ-დასავლეთით მდებარე გოლოსეევსკის რაიონში, ნამსხვრევების ჩამოვარდნის შედეგად, ხანძარი სამსართულიან საწყობს გაუჩნდა, დაიწვა დაახლოებით 1000 კვადრატული მეტრი ფართობი და სამშენებლო კონსტრუქციები. დასავლეთით, სოლომენსკის რაიონში, დრონის ფრაგმენტები შვიდსართულიან არასაცხოვრებელ კორპუსს დაეცა. ქალაქის ცენტრში პეჩერსკის რაიონში ცხრასართულიანი კორპუსის სახურავს ცეცხლი გაუჩნდა.
კვირას კიევი მისი დაარსების დღეს აღნიშნავს (1541წლისთავი), ყურადღებას ამახვილებს Reuters. ამ დღეს იმართება ბაზრობები და კონცერტები, წელსაც იყო გეგმები, მაგრამ უფრო მცირე მასშტაბით. “ცნობილია, რომ უკრაინის ისტორია რუსებისთვის დიდი ხანია გამაღიზიანებელია”, – წერს პრეზიდენტის ოფისის ხელმძღვანელმა ანდრიი ერმაკმა თავის Telegram არხზე თავდასხმის ფონზე.
თვითმხილველებმა როიტერს განუცხადეს, რომ საჰაერო თავდასხმის დროს, რომელიც შუაღამის შემდეგ დაიწყო, კიევის ზოგიერთი მაცხოვრებელი საკუთარ აივანზე იდგა, ზოგი მათგანი რუსეთის პრეზიდენტის შეურაცხყოფელ სიტყვებს და „დიდება საჰაერო თავდაცვას“ ყვიროდა. დილის ექვსის შემდეგ კიევში საჰაერო განგაში გაუქმდა.
რუსეთის თავდაცვის სამინისტროს ახალი მასიური საჰაერო თავდასხმის შესახებ კომენტარი არ გაუკეთებია.
უკრაინის მოსალოდნელი კონტრშეტევის წინ, რუსეთმა მაისში სარაკეტო და უპილოტო იერიშები გააძლიერა .
