ათეულათასობით დანი შეიკრიბა კოპენჰაგენში, სამეფო სასახლესთან, დანიის მეფე ფრედერიკ X-ის მეფობის დასაწყისის აღსანიშნავად.
დანიის პრემიერ მინისტრმა მეტე ფრედერიკსენმა კრისტიანსბორგის სასახლის აივნიდან ფრედერიკი დანიის, გრენლანდიისა და ფარერის კუნძულების მეფედ გამოაცხადა და სამჯერ თქვა ფრაზა “გაუმარჯოს მეფე ფრედერიკ მეათეს!”
იმავე აივნიდან ფრედერიკმა პირველი სიტყვა წარმოთქვა და ხალხს მიმართა:
„იმედი მაქვს, რომ ხვალინდელი დღის გამაერთიანებელი მეფე გავხდები. ეს არის ამოცანა, რომელსაც მთელი ცხოვრება ვასრულებ. ეს არის ამოცანა, რომელსაც სიამაყით, პატივისცემით და სიხარულით ვიღებ“.
მის სიტყვებს გულშემატკივართა ოვაციები მოჰყვა. პოლიციის ინფორმაციით, კოპენჰაგენის ცენტრში 100 ათასამდე ადამიანი შეიკრიბა.
მეფე ფრედერიკი, როგორც ჩანს, გულწრფელად გაოცებული იყო კოპენჰაგენში ხალხის სიმრავლით და რეაქციით და ცრემლიც კი წამოუვიდა
მეფემ ასევე მადლობა გადაუხადა დედას, დედოფალ მარგრეტე II-ს და თქვა, რომ ის ყოველთვის დარჩება გამოჩენილ მმართველად.
მარგრეტე II-მ მოულოდნელად გამოაცხადა ტახტიდან გადადგომის შესახებ ერისადმი საახალწლო სატელევიზიო მიმართვის დროს.
ტახტიდან გადადგომის ოფიციალური ცერემონია კვირას გაიმართა, რის შემდეგაც მისი ვაჟი ავტომატურად გახდა მეფე. დანიაში კორონაციის ცერემონია არ ტარდება.
ახალი მეფის აივანზე გამოსვლის შემდეგ, მას ცოლი, დედოფალი კონსორტ მერი და მათი შვილები, პრინცი კრისტიანი, პრინცესა იზაბელა, პრინცი ვინსენტი და პრინცესა ჟოზეფინა, შეუერთდნენ.
