მე მჯერა, რომ თქვენ იქნებით საუკეთესო პრემიერი – ოცნების დეპუტატი ღარიბაშვილს

ქართული ოცნების დეპუტატი რიმა ბერაძე აცხადებს, რომ ირაკლი ღარიბაშვილი 2012 წლის 1 ოქტომბრის “ღირებულებების სახეა” და ის საუკეთესო პრემიერი იქნება.

“მომავალი პრემიერი – ბატონი ირაკლი ღარიბაშვილი არის პრინციპული, პატრიოტი, სახელმწიფოებრივად მოაზროვნე, სახელმწიფო მმართველობაში გამოცდილი პიროვნება. მისი პრემიერობის დროს, საქართველომ ევროკავშირის ასოცირების ხელშეკრულებას მოაწერა ხელი და ვიზალიბერალიზაცია მოიპოვა.

ის იყო ძალიან წარმატებული შსს მინისტრი, წარმატებული თავდაცვის მინისტრი, სადაც ჩვენი ჯარისკაცების სამუშაო პირობები უმაღლეს დონეზე ავიდა. ბატონი ირაკლი არის 2012 წლის 1 ოქტომბრის, იდეალებისა და ღირებულებების სახე. მე მჯერა, რომ თქვენ იქნებით საუკეთესო პრემიერი, თქვენ იქნებით ის პრემიერი ვინც 2024 წელს ხელს მოაწერს საქართველოს განაცხადს ევროკავშირში გაწევრიანებაზე. წარმატებები”,– წერს ბერაძე Facebook–ზე.

გახარიას გადადგომის შემდეგ ქართულმა ოცნებამ პრემიერობის კანდიდატად ირაკლი ღარიბაშვილი დაასახელა.