“სიმღერა, მუსიკის მოსმენა” – გირჩი აკრძალვების პარალელურად ხალხმრავალ შეხვედრებს აანონსებს

გირჩი განცხადებას ავრცელებს, რომელშიც ვკითხულობთ, რომ პარტიას ხალხმრავალი შეხვედრები აქვს დაგეგმილი, რომელიც აგიტაციასთან ერთად, შესაძლოა გულისხმობდეს მუსიკის მოსმენას, სიმღერასა და სხვა აქტივობებს.

“წინასაარჩევნო კამპანიის ფარგლებში დაგეგმილი გვაქვს მონაწილეობა მივიღოთ სხვადასხვა ტიპის ღია თუ დახურული ტიპის ხალხმრავალ შეხვედრებში.

შეხვედრები იქნება სხვადასხვა ტიპის და გარდა პარტიული აგიტაციისა და გირჩის ლიდერებთან პირადი კონტაქტის დამყარებისა, თავის თავში შეიძლება მოიცავდეს მუსიკის მოსმენას, კერძების დაგემოვნებას, ალკოჰოლის მიღებას, სიმღერასა და სხვადასხვა რიტუალების ჩატარებას”,- წერს გირჩი.

პარტიის განცხადებით, ამ აქტივობებში ხელის შეშლა ხელისუფლების მიერ გირჩის წინასაარჩევნო კამპანიაში ხელის შეშლად იქნება აღქმული.