ბრიტანული გამოცემა The Daily Mirror წერს, რომ კრემლის მაღალჩინოსანი საიდუმლოდ დაუკავშირდა დასავლეთს, რათა მათ მოლაპარაკეების დაწყებაში და უკრაინაში ომის დასრულებაში დაეხმაროს.
ამბობენ, რომ ვლადიმერ პუტინის ელიტის წევრმა, რომლის ვინაობა არ სახელდება, დასავლეთს მიაწოდა ინფორმაცია, რომ კრემლი პანიკაშია და სასოწარკვეთილებამდე მისულს სისხლიანი ომის დასრულება უნდა.
გამოცემა წერს, რომ გასაოცარი ინფორმაცია ამის შესახებ მოყვანილია ანგარიშში, რომელიც დასავლურ სპეცსამსახურებში ვრცელდება.
ითვლება, რომ პუტინთან დაახლოებული უფროსი ოფიცრები და ჩინოვნიკები შეშფოთებულები არიან მკაცრი დასავლური სანქციებით და ომით გამოწვეული ეკონომიკური ვარდნით.
ზოგიერთი კრემლის მაღალჩინოსანი ასევე შეშფოთებულია სულ უფრო მზარდი რისკებით, როგორიც არის საბრძოლო მოქმედებები ზაპოროჟიეს ატომურ ელექტროსადგურზე.
სავარაუდოდ კრემლის ჩინოვნიკი დასავლურ ლიდერებს აშშ–ს ცენტრალურ სადაზვერვო სამსახურში არსებული კონტაქტებით ან დასავლელი დიპლომატების დახმარებით, პუტინის ზურგს უკან დაუკავშირდა.
გამოცემა The Daily Mirror წერს, რომ მათი ინფორმაციით გაჟონილ “ანგარიშს სიტუაციის შესახებ“ სპეცსამსახურები სერიოზულად ეკიდებიან.
დოკუმენტში ნათქვამია: “პუტინის ახლო წრის წარმომადგენლის მხრიდან გაიგზავნა სიგნალი დასავლეთის მიმართულებით მოლაპარაკების დაწყების სურვილის შესახებ. კრემლის ელიტის განწყობა პანიკურია.“
შემდეგ ანგარიშში კრემლის ანონიმი ინსაიდერი “რეჟიმის ერთ–ერთ საყრდენად“ არის მოხსენიებული.
ასევე საუბარია, რომ ინსაიდერი და მისი ოჯახი ვინაობის გამჟღავნების შემთხვევაში სერიოზული საფრთხის წინაშე აღმოჩნდებიან. პუტინმა უკვე ჩაატარა რამდენიმე წმენდა, სამსახურებიდან გაათავისუფლა სამხედრო მეთაურები და მაღალჩინოსანი ჯაშუშები.
ზოგიერთი საერთოდაც გაქრა, ან უცნაურად გახდა ავად.
The Daily Mirror–ს მაღალჩინოსანმა უკრაინულმა წყარომ დიპლომატიური წრეებიდან უთხრა, რომ “მოულოდნელი არ უნდა იყოს, თუ პუტინის ახლო გარემოცვიდან ვინმე ასეთი წინადადებით დასავლეთთან დაკავშირებას ცდილობს.“
“ასეთი რამ ხშირად ხდებოდა მეორე მსოფლიო ომის დასკვნით ეტაპზე, როცა ოფიციალური პირები საკუთარ მომავალზე დარდობდნენ და მის უზრუნველსაყოფად ლიდერისგან მალულ ნაბიჯებს დგამდგნენ.
კრემლის ელიტიდან ბევრი კარგად იცნობს დასავლურ ცხოვრებას, მათი შვილები დასავლურ უნივერსიტეტებში სწავლობენ და დასავლურ ქვეყნებში ცხოვრობენ. მათ იციან, რომ პუტინის ხელისუფლებისგან მოშორებით კარგად შეუძლიათ იცხოვრონ, თუმცა ამისთვის ჯერ არაფერი გაუკეთებიათ, რადგან მეტისმეტად დაშინებულები არიან“– ამბობს დიპლომატი გამოცემასთან საუბრისას.
