რუსეთის პრეზიდენტმა ვლადიმირ პუტინმა ხელი მოაწერა კანონს აფხაზეთთან სამთავრობათაშორისო შეთანხმების რატიფიცირების შესახებ, რომელიც ე. წ. რესპუბლიკის 2026–2030 წლების სოციალურ-ეკონომიკური განვითარების სახელმწიფო პროგრამის განხორციელების ხელშეწყობას ითვალისწინებს. შესაბამისი დოკუმენტი სამართლებრივი აქტების ოფიციალური გამოქვეყნების ვებგვერდზე განთავსდა.
შეთანხმება მოსკოვში 2025 წლის 27 დეკემბერს გაფორმდა. მისი მიზანია რუსეთსა და ოკუპირებულ აფხაზეთს შორის სოციალურ-ეკონომიკური თანამშრომლობის შემდგომი გაღრმავება, ასევე მოსახლეობის ცხოვრების დონის, ეკონომიკური და საინვესტიციო აქტივობის ზრდის ხელშეწყობა.
დოკუმენტის მიხედვით, ფინანსური დახმარების თანხები შეიძლება მოხმარდეს განათლების, ახალგაზრდული პოლიტიკისა და ბავშვთა აღზრდის, კულტურული გაცვლისა და ტურიზმის სფეროებში თანამშრომლობას.
გარდა ამისა, თანხები შესაძლოა გამოყენებულ იქნეს აფხაზეთის საგანგებო სიტუაციების სამინისტროს, რესპუბლიკის პროკურატურისა და სახელმწიფო დაცვის სამსახურის თანამშრომლების ფულადი ანაზღაურებისა და სოციალური გარანტიების გასაზრდელად.
ასევე დადგენილია, რომ ოკუპირებულ აფხაზეთში მუდმივად მცხოვრები რუსეთის მოქალაქეებისთვის კუთვნილი მედიკამენტების მიწოდებაზე პასუხისმგებლობა ადგილობრივ ხელისუფლებას ეკისრება.– წერს რუსული “რია ნოვოსტი“.
