დონალდ ტრამპისთვის თეთრს სახლში გაგზავნილი წერილის კონვერტში მომწამვლელი ნივთიერება რიცინი აღმოჩნდა. წერილი თეთრი სახლისთვის გაგზავნილი ფოსტის შემმოწმებელმა უსაფრთხოების სამსახურმა აღმოაჩინა და მან თეთრ სახლამდე ვერ მიაღწია.
CNN–ის ინფორმაციით, რიცინის დასადგენად ორი ტესტი ჩატარდა. გამომძიებლები ვარაუდობენ, რომ პაკეტი კანადიდან არის გაგზავნილი.
კანადის საზოგადოებრივი უსაფრთხოების მინისტრის პრესმდივნის, მერი-ლიზ ფაუერის განცხადებით, პაკეტის შესახებ საგანგაშო ინფორმაცია მათთვის ცნობილია და კანადელი სამართალადამცავები მჭიდროდ თანამშრომლობენ ამერიკელ კოლეგებთან. თუმცა, იმის გამო, რომ გამოძიება აქტიურად მიმდინარეობს, კომენტარისგან თავს იკავებენ.
ტრამპის ადმინისტრაციას მომხდართან დაკავშირებით კომენტარი არ გაუკეთებია. გამოძიების ფედერალური ბიურო და საიდუმლო სამსახურმა გამოძიება დაიწყეს.
ცნობისთვის, რიცინი ერთ-ერთი უძლიერესი ბიოლოგიური იარაღია, რომელიც მცენარის მარცვლიდან მოიპოვება და სიკვდილს 36-72 საათში იწვევს. მისი უმცირესი დოზის მიღებაც კი შეიძლება ფატალურად დასრულდეს.
