აშშ-ში შაკიკის პრევენციის რეკომენდაციები 14 წლის შემდეგ პირველად განახლდა. ახალი გაიდლაინები უკვე ითვალისწინებს თანამედროვე პრეპარატებს, რომლებიც უშუალოდ შაკიკის განვითარებაში მონაწილე მექანიზმებზე მოქმედებს და ზოგ პაციენტში შეტევების სიხშირეს მნიშვნელოვნად ამცირებს.
ამერიკის ნევროლოგიის აკადემიისა და ამერიკის თავის ტკივილის საზოგადოების ახალი რეკომენდაციები 31 აგვისტოს ჟურნალ Neurology-ში გამოქვეყნდა.
ერთ-ერთი მთავარი ცვლილება ე.წ. CGRP-ზე მოქმედი პრეპარატების ჩართვაა. CGRP არის ნივთიერება, რომლის დონეც შაკიკის შეტევის დროს იზრდება. ახალი წამლები სწორედ ამ მექანიზმზე მოქმედებს და ამიტომ ძველ პრეპარატებთან შედარებით უფრო მიზნობრივ მკურნალობად ითვლება.
ზოგი მათგანი ტაბლეტის სახით მიიღება, ზოგი ინექციით. კვლევების მიხედვით, გარკვეულ პაციენტებში ასეთი მკურნალობა შაკიკის შეტევებს მნიშვნელოვნად ამცირებს და, როგორც წესი, კარგადაც გადაიტანება.
ამასთან, ძველი და შედარებით იაფი საშუალებები — მათ შორის ზოგიერთი წნევის დამწევი და ანტიეპილეფსიური პრეპარატი — კვლავ რჩება მკურნალობის ვარიანტად.
ახალი რეკომენდაციებით, პროფილაქტიკური მკურნალობა უნდა განიხილებოდეს მაშინ, როდესაც შაკიკი ხშირად მეორდება ან ადამიანს მუშაობასა და ყოველდღიურ ცხოვრებაში მნიშვნელოვნად უშლის ხელს.
მიუხედავად ახალი წამლების გამოჩენისა, ექიმებს ჯერ კიდევ უჭირთ წინასწარ განსაზღვრონ, კონკრეტულ პაციენტს რომელი პრეპარატი მოუხდება ყველაზე მეტად. მიზეზი ისაა, რომ შაკიკი ყველას ერთნაირად არ ვითარდება — მის წარმოშობაში მრავალი გენი და სხვადასხვა ბიოლოგიური მექანიზმი მონაწილეობს.
ამიტომ მკურნალობის შერჩევისას ექიმები ითვალისწინებენ არა მხოლოდ შაკიკის სიხშირესა და სიმძიმეს, არამედ პაციენტის სხვა დაავადებებსაც — მაგალითად, მაღალ წნევას, უძილობას, შფოთვას ან დეპრესიას — და იმასაც, ურჩევნია მას ყოველდღიური ტაბლეტი თუ პერიოდული ინექცია.
მეცნიერები უკვე იკვლევენ შაკიკის სხვა ბიოლოგიურ მექანიზმებსაც, რათა მომავალში შესაძლებელი გახდეს კონკრეტული პაციენტისთვის ყველაზე ეფექტიანი მკურნალობის წინასწარ შერჩევა.