„დღეს გვინდა, გავაფრთხილოთ ყველა ავიაკომპანია, რომელიც რუსეთის საჰაერო სივრცეს იყენებს, ყველა, ვინც ჯერ კიდევ სარგებლობს რუსეთის ძირითადი აეროპორტებით: რუსეთის საჰაერო სივრცე ძალიან სახიფათო ხდება.[…] უბრალოდ, რუსეთის ცაზე დრონები იმდენად ბევრი იქნება, რომ ამას ყურადღება სჭირდება. მიუხედავად იმისა, რომ რუსეთის ხელისუფლება ამის შესახებ სათანადოდ არ ავრცელებს ინფორმაციას, ფაქტობრივად, რუსეთის საჰაერო სივრცე დაიხურება – რუსეთის მიერ დაწყებული ომი მის საჰაერო სივრცეს კეტავს.[…] რუსეთის ცაზე უსაფრთხო მომენტები დასრულდა. მნიშვნელოვანია, რომ ეს მოისმინონ როგორც უკრაინაში მომუშავე ქვეყნების ელჩებმა, ისე მოსკოვში მომუშავე ელჩებმა. თითოეულმა მათგანმა ზუსტად იცის, რას ნიშნავს რუსეთის ომი ჩვენი ქვეყნისა და ჩვენი ხალხისთვის და ეს ინფორმაცია საკუთარ დედაქალაქებს უნდა მიაწოდონ“, – განაცხადა ზელენსკიმ.
ზელენსკის თქმით, მნიშვნელოვანია, ეს ინფორმაცია იმ ავიაკომპანიებამდეც მივიდეს, რომლებიც ამჟამად რუსეთის აეროპორტებში, პირველ რიგში კი, მოსკოვში, სანკტ-პეტერბურგსა და რუსეთის სხვა ქალაქების მიმართულებით ფრენებს ასრულებენ.