პროკბრალი წარუდგინეს კაცს, რომელიც 8 და 11 წლის მოზარდებს ინტიმური ფოტო-ვიდეო მასალის გაგზავნას აიძულებდა. პროკურატურის ინფორმაციით, ბრალდებული ჯერ დაკავებული არაა და მასზე ძებნაა გამოცხადებული. კაცს ყალბი ანგარიშები ჰქონდა Tik-Tok-ზე შექმნილი, საიდანაც არასრულწლოვნებთან “სექსუალური შინაარსის კომუნიკაციას” ამყარებდა.
“თბილისის პროკურატურის პირადი ცხოვრების ხელყოფის წინააღმდეგ ბრძოლის სამმართველოს მიერ ჩატარებული გამოძიებით დადგინდა, რომ ბრალდებულს სოციალური ქსელის – “TikTok”-ის ყალბი ანგარიშების და “whatsapp”-ის აპლიკაციით, 8 და 11 წლის მოზარდებთან, ნდობის მოპოვების შემდეგ, სექსუალური შინაარსის კომუნიკაცია ჰქონდა. დაზარალებულების ასაკის გამოყენებით და სახელის გამტეხი ინფორმაციის გავრცელების მუქარით, აიძულებდა მათ ინტიმური შინაარსის, მათ შორის, სექსუალური ხასიათის ქმედებების ამსახველი ფოტო-ვიდეოს გადაღებას და გაგზავნას და ერთ-ერთ დაზარალებულს თავადაც უგზავნიდა სექსუალური შინაარსის ვიდეოებს. ასევე, ბრალდებულმა დაზარალებულისგან უკანონოდ მოპოვებული ინტიმური შინაარსის ფოტოსურათები გაუგზავნა მის დედას”, – წერია პროკურატურის განცხადებაში.
კაცს ბრალდება დაუსწრებლად საქართველოს სისხლის სამართლის კოდექსის 157-ე პრიმა მუხლის პირველი ნაწილით (პირადი ცხოვრების საიდუმლოს უკანონო მოპოვება, გამოყენება და გავრცელება), 141-ე მუხლის მე-2 ნაწილის “ვ” ქვეპუნქტით (წინასწარი შეცნობით თოთხმეტი წლის ასაკს მიუღწეველი პირის მიმართ გარყვნილი ქმედება) და 139-ე მუხლის მე-4 ნაწილის ,”ბ” ქვეპუნქტით (არასრულწლოვანის მიმართ სექსუალური ხასიათის ქმედების იძულება) წარედგინა.
დანაშაული 15 წლამდე თავისუფლების აღკვეთას ითვალისწინებს.