აშშ და ირანი ჯერჯერობით არ დათანხმებულან ახლო აღმოსავლეთში ომის დასრულებაზე მოლაპარაკებების დაწყების წინადადებებს, თუმცა ასეთი მოლაპარაკებების ორგანიზების მცდელობები გრძელდება — წერს სააგენტო Reuters.
სააგენტოს სამი ინფორმირებული წყაროს თქმით, აშშ-ის პრეზიდენტ დონალდ ტრამპის ადმინისტრაციამ უარყო ახლო აღმოსავლეთში არსებული მოკავშირეების წინადადებები მსგავსი მოლაპარაკებების ორგანიზების შესახებ.
კომუნიკაციის არხის შექმნას განსაკუთრებით ცდილობდა ომანი, რომელიც ჯერ კიდევ ომის დაწყებამდე იყო შუამავალი თეირანსა და თეთრ სახლს შორის მოლაპარაკებებში. თუმცა, Reuters-ის ორი წყაროს ინფორმაციით, თეთრმა სახლმა მიანიშნა, რომ ამ ეტაპზე ასეთ პროცესით დაინტერესებული არ არის.
თეთრი სახლის ოფიციალურმა წარმომადგენელმა სააგენტოს დაუდასტურა, რომ ტრამპი ახლა მოლაპარაკებებისთვის არ არის განწყობილი:
„ამ ეტაპზე ის ამით დაინტერესებული არ არის. ჩვენ გავაგრძელებთ ჩვენი მისიის შესრულებას. შეიძლება ოდესმე — მაგრამ არა ახლა.“
თავად ტრამპმა განაცხადა, რომ ირანი შეთანხმებით არის დაინტერესებული, მაგრამ არა იმ პირობებით, რომლებიც ვაშინგტონს მისაღებად მიაჩნია.
თავის მხრივ, ირანი მოითხოვს, რომ აშშ-მა და ისრაელმა შეწყვიტონ დარტყმები, სანამ ცეცხლის შეწყვეტის შესახებ რაიმე მოლაპარაკება დაიწყება — აცხადებენ Reuters-ის ირანული წყაროები.
დღეს ირანის პოლიტიკური მიზანშეწონილობის განსაზღვრის საბჭოს წევრმა, გენერალ-მაიორმა მოჰსენ რეზაიმ, განაცხადა, რომ ომი არ დასრულდება, სანამ თეირანს არ აუნაზღაურებენ მიყენებულ ზიანს და ამერიკული სამხედრო ძალები სპარსეთის ყურეს არ დატოვებენ.
Reuters-ის ინფორმაციით, ომის შეჩერების მიზნით საკომუნიკაციო არხის შექმნას ეგვიპტის ხელისუფლებაც ცდილობდა. მიუხედავად იმისა, რომ ეს მცდელობები ჯერჯერობით უშედეგოა, კაირომ მაინც შეძლო მიეღწია გარკვეული „სამხედრო თავშეკავებისთვის მეზობელი ქვეყნების მხრიდან, რომლებიც ირანის მოქმედებებით დაზარალდნენ“, — უთხრა სააგენტოს დიპლომატიისა და უსაფრთხოების სფეროსთან დაკავშირებულმა წყარომ.
აშშ-ისთვის ომის სწრაფად დასრულების საკითხი განსაკუთრებით გამწვავდა მსოფლიო ნავთობის ბაზარზე არსებული ვითარების გამო. Reuters აღნიშნავს, რომ ტრამპის ზოგიერთი მრჩეველი მოუწოდებს მას კონფლიქტის შეჩერებისკენ და აფრთხილებს, რომ ბენზინის ფასების ზრდა შესაძლოა ძვირად დაუჯდეს რესპუბლიკურ პარტიას აშშ-ში მოახლოებულ შუალედურ არჩევნებზე. სხვები კი მიიჩნევენ, რომ ირანის სამხედრო ობიექტებზე დარტყმები უნდა გაგრძელდეს.
Reuters-ის შეფასებით, ამ ეტაპზე ვაშინგტონი და თეირანი მოლაპარაკებებისთვის კიდევ უფრო ნაკლებად მზად არიან, ვიდრე ომის დასაწყისში.
სააგენტოს ერთ-ერთმა წყარომ აღნიშნა, რომ მაშინ ირანის უსაფრთხოების სფეროს მთავარი წარმომადგენელი, გავლენიანი პოლიტიკოსი ალი ლარიჯანი, და საგარეო საქმეთა მინისტრი აბას არაღჩი ომანის შუამავლობით ცდილობდნენ ცეცხლის შეწყვეტის განხილვას აშშ-ის ვიცე-პრეზიდენტ ჯეი დი ვენსთან. თუმცა ეს მოლაპარაკებები საბოლოოდ არც კი დაწყებულა.
მას შემდეგ თეირანის პოზიცია კიდევ უფრო გამკაცრდა.
„ისლამური რევოლუციის გუშაგთა კორპუსი მტკიცედ არის დარწმუნებული, რომ თუ თეირანი ჰორმუზის სრუტეზე კონტროლს დაკარგავს, ირანი ომს წააგებს,“ — განუცხადა Reuters-ს ერთ-ერთმა მაღალი რანგის ირანელმა წყარომ.
„ამიტომ ისინი ჯერჯერობით არ დათანხმდებიან არც ზავს, არც ცეცხლის შეწყვეტის მოლაპარაკებებს და არც სხვა დიპლომატიურ ძალისხმევას.“
