“ეს აბსურდი როგორ მოვინანიო? ან რა მოვინანიო?”- 4 ოქტომბრის საქმეზე “ჯგუფური ძალადობის ორგანიზებაში” მსჯავრდებული პაატა მანჯგალაძე საპროცესო შეთანხმებებთან დაკავშირებით ციხიდან წერილს ავრცელებს.
“1. მესმის, დიდია ცდუნება, ვაკრიტიკოთ ერთმანეთი, თუმცა, შეუმცდარები არცერთი არ ვართ. შესაბამისად, ჩვენთვის მიუღებელი ან განსხვავებული პოზიცია არ ნიშნავს ავტომატურად ღალატს ან ვინმეს მოღალატედ გამოცხადების შესაძლებლობას;
2. არსებულ პირობებში საპროცესო შეთანხმება იქნება თავისუფალი არჩევანი და ჩვენ უნდა შევძლოთ მათი გაგება, ვინც ეს ნაბიჯი გადადგა.
3. არ ვთვლი, რომ ჰუმანიზმი და ქრისტიანობაა, ადამიანს დააბრალო დანაშაული, დააკავო უკანონოდ, შემდეგ ისეთი პირობები შეუქმნა, რომ აღიაროს და მოინანიოს ის, რაც არ ჩაუდენია, ვგულისხმობ ჩემს შემთხვევას როცა მოსამართლემ პირდაპირ გადააკოპირა ბრალის აღწერისას ბრალდების მტკიცება, თითქოს 2025 წლის 4 ოქტომბერი დავაორგანიზე 2024 წლის ოქტომბერში, ანუ ერთი წლით ადრე გაკეთებული განცხადებებით. ეს აბსურდი როგორ მოვინანიო? ან რა მოვინანიო?
4. ადრე გაცხადებულ, ნულოვან თანაგრძნობასთან შედარებით, რა თქმა უნდა, შესამჩნევია ხელისუფლების ნების ცვლილება, მაგრამ ადამიანს აღიარებინო ის, რაც არ ჩაუდენია, ვერ ჩაითვლება ჰუმანურობად.
იმედი მაქვს, გააცნობიერებენ გადაწყვეტილების მიმღებებიც, რომ მომავალში მათაც იგივე ცული არ მიეზღოთ, რითაც დღეს ჭრიან.“ – წერს მანჯგალაძე.
“4 ოქტომბრის საორგანიზაციო კომიტეტის” ხუთივე წევრს 7-7 წლით თავისუფლების აღკვეთა აქვს მისჯილი. მათგან ორს – მურთაზ ზოდელავასა და ლაშა ბერიძეს საპროცესო შეთანხმება გაუფორმდებათ. პაატა ბურჭულაძის ადვოკატის თქმით, მისი დაცვის ქვეშ მყოფი საპროცესო შეთანხმებაზე იფიქრებს მას შემდეგ, რაც “ყველა პოლიტპატიმარს მიეცემა თავისუფლების შანსი”, ირაკლი ნადირაძის თქმით, ივანიშვილის რეჟიმს არც შეწყალებას სთხოვს და მასთან არც საპროცესო შეთანხმებას განიხილავს, პაატა მანჯგალაძის პოზიციით კი, “ვერ მოვინანიებ ვერც სამშობლოს სიყვარულს და ვერც იმას, რაც პროკურატურამ დამაბრალა”.