13-14 ოქტომბრის ღამესა და გამთენიისას, რუსულმა ძალებმა მიზანმიმართული იერიში მიიტანეს კიევის რამდენიმე ენერგოობიექტზე, მათ შორის დედაქალაქის ერთ-ერთ უმთავრეს თბოელექტროსადგურზე (CHPP-4). დარტყმების შედეგად კიევის ხუთ რაიონში (დარნიცკი, დნიპროვსკი, პეჩერსკი, სოლომიანსკი და ჰოლოსიევსკის ნაწილი) ელექტროენერგიის მიწოდება ავარიულად შეწყდა.
ბალისტიკური რაკეტა მოხვდა დესნიანსკის რაიონში მდებარე 9-სართულიან საცხოვრებელ კორპუსს. გაჩნდა ძლიერი ხანძარი. ბოლო მონაცემებით, დაიღუპა 3 ადამიანი, ხოლო 21-ზე მეტმა პირმა, მათ შორის ერთმა ბავშვმა, სხეულის დაზიანებები მიიღო.
უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინულმა რადარებმა რაკეტები მხოლოდ მაშინ დააფიქსირეს, როდესაც ისინი უკვე კიევის გარეუბნებს უახლოვდებოდნენ. უკრაინას დასავლელი პარტნიორებისგან წინასწარი სადაზვერვო მონაცემები და გაფრთხილება ამჯერადაც არ მიუღია.
დონალდ ტრამპის მიერ 11 ოქტომბერს გაჟღერებული განცხადების მიუხედავად, რომ მხარეები ენერგეტიკულ სექტორზე დარტყმების შეწყვეტაზე შეთანხმდნენ, კრემლს რეალური ნაბიჯები არ გადაუდგამს. უკრაინამ ორმხრივი პაუზის მზადყოფნის ნიშნად რუსულ ნავთობგადამამუშავებელ ქარხნებზე იერიშები დროებით შეაჩერა, თუმცა რუსეთმა ეს პერიოდი კიევის კრიტიკული ქსელის წინააღმდეგ ახალი ბალისტიკური დარტყმების მოსამზადებლად გამოიყენა. ზელენსკიმ მოსკოვის ეს ქმედება აშშ-ის ინიციატივის აშკარა უპატივცემულობად შეაფასა.
ვოლოდიმირ ზელენსკის ინფორმაციით, რუსეთმა 39 ბალისტიკური რაკეტა და 120-ზე მეტი დრონი გამოიყენა კიევში, კიევის ოლქსა და ხარკოვში მდებარე ენერგეტიკული და კრიტიკული ინფრასტრუქტურის წინააღმდეგ.
„დარტყმა სრულად განზრახული და მასშტაბის მხრივ დემონსტრაციული ხასიათის იყო – რუსეთს შეერთებული შტატების მიმართ ასეთი დემონსტრაციული უპატივცემულობა აქამდე არასდროს გამოუვლენია. რუსეთი ამერიკის პრეზიდენტის განცხადებებს არ მიიჩნევს ძლიერად. სამწუხაროდ, ამჟამად ელექტროენერგიის გარეშეა დარჩენილი სულ მცირე 600 000 ადამიანი. შესაძლოა, გათიშვები კიდევ უფრო მასშტაბური გახდეს. სამწუხაროდ, მნიშვნელოვნად დაზიანდა ობიექტები და აღჭურვილობა – ჩვენი ენერგოსისტემის 26 და ნავთობისა და გაზის სექტორის ოთხ ობიექტზე.
მოვუწოდებთ ამერიკას და მსოფლიოში ყველას, ვინც თვალს არ ხუჭავს რეალობაზე, მოახდინონ რეაგირება – თანაც მტკიცე რეაგირება. რუსეთმა ხელიდან გაუშვა დეესკალაციის შანსი და აშკარად აირჩია განადგურებისკენ მიმართული თავისი გიჟური ომის გაგრძელება. მოვუწოდებთ პრეზიდენტ ტრამპს, დაუწესოს რუსეთს მკაცრი სანქციები, მით უმეტეს, რომ ლინდსი გრემის კანონპროექტი, რომელიც ცოტა ხნის წინ დამტკიცდა და კანონად იქცა, სწორედ ასეთი ზომების გატარების უფლებას იძლევა და მათ არეგულირებს.
ვითხოვთ Patriot-ის ტიპის საზენიტო-სარაკეტო სისტემების დამატებით პაკეტებს უკრაინისთვის. სრულიად სამართლიანია, როდესაც შეერთებულ შტატებს, ევროპასა და ჩვენს ყველა პარტნიორს ვეუბნებით, რომ მსოფლიოში არცერთი ქვეყანა არ უნდა დარჩეს პირისპირ მარტო ისეთ შეშლილ და ომის მომხრე აქტორთან, როგორიც რუსეთია”, – განაცხადა უკრაინის პრეზიდენტმა.