„საკმარისია“, – ზელენსკიმ განაცხადა, რომ უკრაინა რუსულ ნავთობგადამამუშავებელ ქარხნებზე დარტყმებს განაახლებს

ვოლოდიმირ ზელენსკიმ განაცხადა, რომ უკრაინა რუსულ ნავთობგადამამუშავებელ ქარხნებზე დარტყმებს განაახლებს. ამის შესახებ უკრაინის პრეზიდენტმა Financial Times-თან ინტერვიუში ისაუბრა.

„აკრძალვა მოხსნილია.  საკმარისია. უკრაინა სამი დღის განმავლობაში არ ესხმოდა თავს რუსეთის ენერგეტიკულ ობიექტებს, რითაც აშშ-ის სურვილს ასრულებდა. ამავდროულად, მოსკოვმა განაგრძო დარტყმები უკრაინის ენერგეტიკულ ინფრასტრუქტურაზე, რის შედეგადაც გასული კვირის განმავლობაში 100-ზე მეტი მშვიდობიანი მოქალაქე დაიღუპა. მიუხედავად იმისა, რომ უკრაინამ შეწყვიტა ნავთობგადამამუშავებელ ქარხნებზე დარტყმების მიყენება, იგი ამერიკული გაფრთხილებების გარეშე დარჩა რუსეთის მიერ ბალისტიკური რაკეტებით თავდასხმების შესახებ. გარდა ამისა, შეიზღუდა Starlink-ის ტერმინალების მუშაობაც. ეს არ ყოფილა ტექნიკური პრობლემა, ეს იყო გადაწყვეტილება“ – თქვა უკრაინის პრეზიდენტმა.

ზელენსკიმ დაადასტურა, რომ ამერიკელები აფრთხილებდნენ უკრაინას: თუ კიევი არ შეწყვეტდა ნავთობგადამამუშავებელ ქარხნებზე  დარტყმებს, აშშ შეწყვეტდა სადაზვერვო მონაცემების მიწოდებას. მან ასევე უარყო ვერსია, თითქოს Starlink-თან დაკავშირებული პრობლემები რაიმე გაუმართაობით იყო გამოწვეული. „ეს არ ყოფილა ტექნიკური პრობლემა, ეს იყო გადაწყვეტილება“, — თქვა მან.

კითხვაზე, შეეძლო თუ არა უკრაინას შეეწყვიტა დარტყმები ნავთობგადამამუშავებელ ქარხნებზე  ვაშინგტონთან ურთიერთობების გაუმჯობესების მიზნით – თუნდაც იმ შემთხვევაში, თუ რუსეთი განაგრძობდა საკუთარ თავდასხმებს – ზელენსკიმ უპასუხა, რომ მას შეეძლო ამ ნაბიჯზე წასვლა Patriot-ის კომპლექსებისთვის დამატებითი რაკეტების მიწოდების სანაცვლოდ.

11 ოქტომბერს დონალდ ტრამპმა განაცხადა, რომ რუსეთი და უკრაინა ენერგეტიკულ სფეროში ზავზე შეთანხმდნენ. მალევე ზელენსკიმ განაცხადა, რომ უკრაინის შეიარაღებულმა ძალებმა ამასთან დაკავშირებით „ყველა შესაბამისი ბრძანება მიიღეს“. ამის შემდეგ უკრაინას რუსულ ნავთობგადამამუშავებელ ქარხნებზე  დარტყმები არ განუხორციელებია. ამავდროულად, რუსეთის თავდაცვის სამინისტრო, მაგალითად, ავრცელებდა ანგარიშებს, რომ რუსეთის შეიარაღებულმა ძალებმა დარტყმები მიიტანეს კიევის საკომუნიკაციო და ენერგეტიკულ ინფრასტრუქტურას.

Axios-ის ინფორმაციით, ტრამპი იმედოვნებს, რომ ზელენსკი დაიცავს ენერგეტიკულ ზავს და შეწყვეტს დარტყმებს რუსულ ნავთობგადამამუშავებელ ქარხნებზე. „ტრამპი ძალიან გაბრაზებულია. მას ეჩვენება, რომ ზელენსკი აშშ-ის დახმარებას თავისთავად ნაგულისხმევ მოვლენად აღიქვამს“, — აცხადებდა გამოცემის წყარო თეთრ სახლში.