კრემლის განცხადებით, რუსული დიზელის საექსპორტო მიწოდება გლობალურ ბაზარზე ოფიციალურად აღდგა. აღნიშნული გადაწყვეტილება მოჰყვა აშშ-ის პრეზიდენტ დონალდ ტრამპთან მიღწეულ შეთანხმებას, რომლის მიზანიც საწვავზე საერთაშორისო ფასების შემცირებაა.
როგორც საერთასორისო მედია წერს, საზღვაო გადაზიდვების მონაცემები ადასტურებს, რომ ბალტიისპირეთის პორტებიდან ტანკერების დატვირთვა უკვე დაიწყო.
კრემლის პრესსპიკერმა, დიმიტრი პესკოვმა დაადასტურა, რომ საწვავის პირველი პარტიები უკვე გზაშია. ლონდონის საფონდო ბირჟის ჯგუფის (LSEG) მონაცემებით, დიზელის დატვირთვა პრიმორსკის საკვანძო პორტში განხორციელდა. მოსკოვის განცხადებით, ვაჭრობის აღდგენა გლობალური ბაზრის დასასტაბილურებლად არის მიმართული, თუმცა პესკოვმა აღნიშნა, რომ საწყისი მოცულობები სრული ბალანსის მისაღწევად საკმარისი არ იქნება.
აშშ-ის პრეზიდენტმა დონალდ ტრამპმა განაცხადა, რომ შეთანხმება მიზნად ისახავს მომხმარებლებისა და ბიზნესისთვის ფასების შემსუბუქებას. მისი სურვილია, შეამციროს საწვავის ფასი 3 ნოემბრის შუალედური არჩევნების წინ.
გეგმის მიხედვით, მიწოდება რამდენიმე ეტაპად განხორციელდება:
პირველი ტრანში: 300,000 ტონაზე მეტი (დაახლოებით 2.25 მილიონი ბარელი) ამერიკული და გლობალური ბაზრებისთვის.
ნოემბრის პარტია: დამატებით 500,000 ტონა.
მომდევნო ეტაპი: კიდევ 1 მილიონი ტონა.
აშშ-ის ენერგეტიკული ინფორმაციის ადმინისტრაციის მონაცემებით, ამერიკის სატრანსპორტო სექტორი დღეში 2.94 მილიონ ბარელ დიზელს მოიხმარს. შესაბამისად, პირველი პარტია აშშ-ის ერთდღიან მოთხოვნილებაზე ნაკლებია, ხოლო მომდევნო ეტაპების ჯამური მოცულობა (1.5 მლნ ტონა) ქვეყანას ოთხ დღეზე ნაკლებ ბენეფიტს მისცემს.
გრძელვადიან პერსპექტივაში, რუსეთი გეგმავს 2026 წლის ბოლომდე ყოველთვიური ექსპორტი 3.5 მილიონ ტონამდე გაზარდოს, რითაც გლობალურ ბაზარზე საკუთარ წილს 10%-მდე აიყვანს.
რუსული დიზელის ბაზარზე დაბრუნებამ დასავლეთში სერიოზული გეოპოლიტიკური უთანხმოება გამოიწვია. უკრაინის პრეზიდენტმა ვოლოდიმირ ზელენსკიმ, ევროკავშირის ოფიციალურმა პირებმა და თავად პრეზიდენტ ტრამპის რესპუბლიკური პარტიის ნაწილმა შეთანხმება მკაცრად დაგმეს. მათი თქმით, ეს ნაბიჯი აზიანებს საერთაშორისო სანქციების სისტემას, რომელიც რუსეთის სამხედრო შემოსავლების შეზღუდვას ისახავს მიზნად.
რუსულმა მხარემ კი პასუხად განაცხადა, რომ ევროპული ქვეყნების ნაწილი, დაწესებული შეზღუდვების მიუხედავად, კვლავ აგრძელებს რუსული მილსადენის ნავთობისა და გათხევადებული ბუნებრივი აირის შესყიდვას.
ენერგეტიკული ანალიტიკოსები ყურადღებით აკვირდებიან, თუ როგორ აისახება ექსპორტის ნაწილობრივი აღდგენა ტრანსატლანტიკურ ფასებსა და სამომავლო გეოპოლიტიკურ სავაჭრო ალიანსებზე.