პოლონეთში მხატვარ სკრეპეცკის მკვლელობის საქმეზე მეორე ეჭვმიტანილი დააკავეს. ის საქართველოს მოქალაქეა.მედიის ინფორმაციით, ის სემიონ სკრეპეცკის უთვალთვალებდა.
პოლონეთის შიდა უსაფრთხოების სააგენტოს თანამშრომლებმა ქვეყნის ტერიტორიაზე მხატვარ-აქციონისტ სემიონ სკრეპეცკის მკვლელობის საქმეზე მეორე ეჭვმიტანილი დააკავეს. დაკავებულს — საქართველოს 22 წლის მოქალაქეს — სავარაუდო მკვლელის თანამზრახველად მიიჩნევენ. ამის შესახებ პოლონეთის სპეცსამსახურების კოორდინატორმა ტომაშ სემონიაკმა სოციალურ ქსელ X-ში განაცხადა.
რადიოსადგურ RMF FM-ის ინფორმაციით, დაკავებულის სახელია მაჰმუდ ა. ის უშუალოდ დანაშაულის ჩადენამდე სკრეპეცკის უთვალთვალებდა და ინფორმაციას სავარაუდო მკვლელს გადასცემდა. ამის შემდეგ კაცმა ქვეყანა დატოვა, თუმცა ოქტომბერში ნაცნობებთან ერთად პოლონეთში დაბრუნდა. RMF FM-ის ცნობით, მისი თანმხლები პირები ქვეყნიდან უკვე გააძევეს.
დაკავებულს სამთვიანი პატიმრობა შეუფარდეს. მას ბრალი მკვლელობაში დახმარებასა და იარაღის უკანონო შენახვაში წაუყენეს. კაცი დანაშაულს არ აღიარებს.
სემიონ სკრეპეცკის მკვლელობა პოლონეთში
44 წლის რუსეთის მოქალაქე სემიონ სკრეპეცკი, რომლის ნამდვილი სახელიც რობერტ კუზოვკოვი იყო, პოლონეთში 2021 წლიდან ცხოვრობდა. ის 15 ივნისს ხუთი გასროლით მოკლეს პოლონეთის ქალაქ ბიალა-პოდლასკის ავტოსადგომზე.
სკრეპეცკი ცნობილი იყო სატირული, პოლიტიკური და ომის საწინააღმდეგო კარიკატურებითა და აქციებით, რომლებითაც რუსეთის ხელისუფლებას აკრიტიკებდა და დასცინოდა. ყველაზე ხშირად ის რუსეთის პრეზიდენტ ვლადიმირ პუტინისა და იოსებ სტალინის კარიკატურებს ქმნიდა. თავის ნამუშევრებსა და სოციალურ ქსელებში გამოქვეყნებულ პოსტებში სკრეპეცკი ასევე დასცინოდა ალექსანდრ ლუკაშენკოს, ალექსეი და იულია ნავალნებს, ომის მომხრე რუსებსა და უკრაინის მცხოვრებლებს.
მკვლელობამდე სამი დღით ადრე სკრეპეცკიმ ბერლინში, რუსეთის საელჩოსთან, რუსეთის დღის აღნიშვნასთან დაკავშირებული აქცია გამართა. პერფორმანსის დროს მან შარვლის უკანა ნაწილში გაკეთებული ჭრილიდან რუსეთის დროშა ამოიღო და სანაგვეში გადააგდო. როგორც მხატვარი წერდა, ამის გამო „რუსი პატრიოტებისგან“ მუქარები მისდიოდა.
სკრეპეცკის მკვლელობის საქმეზე საქართველოს ერთი მოქალაქე უკვე დაკავებულია
მხატვარ-აქციონისტის მკვლელობიდან მალევე პოლონეთის პოლიციამ ორი ეჭვმიტანილი – ბელარუსის მოქალაქეები – დააკავა. გამოძიებამ დანაშაულთან მათი კავშირი ვერ დაადასტურა. ისინი მოწმეებად დაკითხეს და გაათავისუფლეს.
მოგვიანებით სამართალდამცველებმა მკვლელობასთან დაკავშირებით კიდევ ერთი პირი დააკავეს. პოლონეთის პრემიერ-მინისტრმა დონალდ ტუსკმა განაცხადა, რომ საუბარი იყო ადამიანზე, რომელიც „საქართველოს პასპორტს იყენებდა“.
მედიის ინფორმაციით, ეჭვმიტანილი საქართველოს 36 წლის მოქალაქე ელნურ ა. აღმოჩნდა. მან დანაშაული არ აღიარა და ჩვენების მიცემაზე უარი თქვა.