ხმაური იყო დღეს პარლამენტის შენობასთან, სადაც ტაქსის მძღოლები თბილისის მერიის მიერ ტაქსებზე რეგულაციების დაწესებას აპროტესტებდნენ. აქციის მონაწილეებსა და სამართალდამცავებს შორის სიტუაცია მას შემდეგ დაიძაბა, რაც მძღოლებმა და აქციაზე მისულმა პოლიტიკოსებმა, შალვა ნათელაშვილმა და მისი პარტიის წევრებმა რუსთაველის გამზირი გადაკეტეს. თბილისის მთავარი გამზირი მას შემდეგ გაიხსნა, რაც პოლიციამ ერთი პირი დააკავა. ერთი ტაქსის მძღოლი კი შეუძლოდაც გახდა. ის სასწრაფო დახმარების ბრიგადამ კლინიკაში გადაიყვანა.
აქციის მონაწილეების პროტესტის მთავარი მიზეზი თბილისის მერიის მიერ გამოცხადებული ის რეგულაციაა, რომლის მიხედვითაც A კატეგორიის ტაქსის მძღოლებს მანქანების თეთრად შეღებვის ვალდებულება აქვთ. ტაქსის მძღოლები აცხადებენ, რომ მათთვის ახალ რეგულაციებზე გადასვლა დამატებით ფინანსურ ხარჯებს მოითხოვს.აქციის მონაწილეები ტაქსებზე დაწესებული რეგულაციების 2025 წლამდე გადავადებას ითხოვენ. მოთხოვნებს შორის არის მანქანების თეთრად შეღებვის ვალდებულების გადავადებაც.
